লৈঙাক অমসুং য়ূ এন সীগী মরক্তা ৱারী শান্নখ্রে

নাগা মীচম তরুক কুকি মিলিটেন্টশিংনা হোষ্টেজ ওইনা ফাজীন্দুনা থমখ্রবা মতূঙ তমথীনা মীওৎ-মীনৈ চত্থরবা মতূংদা হাৎখিবা থৌওং অদুবু য়ানিংদবা উত্তুনা য়ুনাইটেদ নাগা কাউন্সিল (য়ু এন সী) না নেস্নেল হায়ৱে-২ দা হৌজিক হৌজিক চত্থরিবা মতম কক্তবা ইকোনোমিক ব্লোকেদ অসী হন্দোকহন্ননবা পান্দমদা ঙরাং দিপ্যুটি চিফ মিনিষ্টর লোসী দিখো অমদি ষ্টেট লৈঙাক্কি হোম মিনিষ্টর গোবিন্দাস কোন্থৌজম্না লুচিংবা মিনিষ্টরিয়েল টিম অমনা সেনাপটি দিষ্ট্রিক্ট হেদক্বার্টরদা চত্তুনা য়ু এন সীগী লুচিংবশিংগা ৱারী শানখ্রে।
য়ু এন সিগী মায়কৈদগী মখোয়না তাল্লিবা চার্টর ওফ দিমান্দ ৪ অদূ নৌহৌননা পুখৎলকখিবগা লোয়ননা দিমান্দশিং অদূ ফংদ্রিবফাওবা ব্লোকেদ হন্দোকপগী ৱাফম অমত্তা লৈতে হায়বা অকনবা ৱাফম থমখ্রে। বাই রোদতা চত্তুনা ঙরাং ৱারী শাননবা চৎখিবা মিনিষ্টরিয়েল টিম অদুদা দিপ্যুটি চিফ মিনিষ্টর লোসি দিখো, হোম মিনিষ্টর গোবিন্দাস কোন্থৌজম, এম এল এশিং তোংব্রম রোবিন্দ্রো, পাউনম ব্রোজেন, টি ঐচ রাধেস্যাম, নুরূল হাসন, খাসিম ভাসুম, অৱাংবৌ ন্যুমাই অমসুং জামহেংলুং পামৈ শরুক য়াখি। য়ু এন সীগী মায়কৈদনা মসীগী প্রসিদেন্ট না লুচিংবা মেম্বর ৯গী দেলিগেসন অমনা শরূক য়াখি।
অয়ূক পূঙ ১১ তাবদগী এস এম সা হোলদা পাঙথোকখিবা মীফমদুদা লৈঙাক্কি মায়কৈদগী, হৌজিক য়ূ এন সিনা চত্থরিবা ইকোনোমিক ব্লোকেদ অসী হন্দোক্নবা য়াম্না কন্না আপিল তৌখি অদুবু য়ু এন সীগী মায়কৈদগী, মখোয়না তাল্লিবা দিমান্দশিং ফংদ্রিবা ফাওবা অকনবা খোঙজঙ চত্থখিগনি, খোঙজঙ লেপ্পগী ৱাফম অমত্তা লৈরোই, দিমান্দশিং অদূ ফংদ্রিফাও হেন্না অকনবা খোঙজং চঙশীন্ননবা শেম শাদুনা লৈরি হায়বা ৱাফম ফোঙদোরকখি হায়রি।
চত্থখিবা মীফম অদূ আইস ব্রিক সেসন অমগুম্বনি, হৌবখক্তা ঙায়রি, মথঙ মথঙ চত্থগদবা লৈরি, য়ানবা পুরক্কনি হায়বগী থাজবা লৈরি হায়না লৈঙাক্কি ৱাঙাঙলোয়সু ওইরিবা এম এল এ, টিঐচ রাধেশ্যাম্না পাউমীশিংদা ফোঙদোকখি।