জুলাই ২৯ ফাওবগী মনূঙদা অফবা, থক্নবা ঈশীঙ ফংহন্দ্রবদি অকনবা খোঙজঙ চঙশীল্লগনি: লূপশিং

চহী কয়াগী মমাঙদগী মনিপুর লৈঙাক্কি মখাদা লৈরিবা পব্লিক হেল্থ ইঞ্জিনিয়ারিং দিপার্টমেন্ট (পি ঐচ ই দি) গী মীৎয়েং মখাদা পায়খৎলকখিবা, ইম্ফাল ৱেষ্ট দিষ্ট্রিক্টকি হাওরৈবী অৱাং লৈকায়দা লৈরিবা ৱাটর সপ্লাই স্কিম অসী হৌখিবা এপ্রিল ২৯ দা চিফ মিনিষ্টর য়ূম্নাম খেমচান্দনা, লাংথবাল এসেমব্লি কনস্তিত্যুএন্সিগী এম এল এ কারাম শ্যামগা লোয়ননা লাক্তুনা শঙ্গাখ্রবসু ঙসী ফাওবা ৱাটর সপ্লাই স্কিম অসীনা কোল্লিবা সধারন মীয়ামদা অফবা থক্নবা ঈশীং মরীক অমা ফাওবা ফংহন্দনা লৈরি। প্রোজেক্ট অসী হৌজিক ফাওবা ফঙ্কসন্নেল ওইবা ঙমদ্রি, থবক-থৌরম অমত্তা হৌদনা, চপ লেপতুনানা লৈরি হায়না হাওরৈবী মায়কৈগী লূপ কয়ানা পেন্দবা ফোঙদোক্নদুনা লাক্লি।
মসীগী শরূক অমা ওইনা মায়কৈ অসোমগী লূপ মঙানা নৌনা থাদোরকপা চেরোল অমদা হায়, লাক্লিবা জুলাই ২৯ ফাওবগী মনূঙদা লৈঙাক্কি মরী লৈনবা অথোরিটিশিংনা প্রোজেক্ট অসী মপূঙ ফানা থবক্তা ওন্থোক্তুনা মায়কৈ অসোমদা লৈরিবা মীয়ামদা তরু-তরুবা, অফবা থক্নবা ঈশীং ফংহনবা ঙমদ্রবদি মরী লৈনবা মীয়াম অমসুং ষ্টেকহোল্ডরশিংগা খূৎশম্নরগা হেন্না অকনবা খোঙজং চঙশীল্লগনি।ৱাটর সপ্লাই স্কিম অসীগী তোঙান তোঙানবা ইনফ্রাষ্ট্রকচরগী কম্পোনেন্টশিং মপূঙ ফানা ইন্সটোল তৌদ্রিঙৈ চৈরক্তা ঙম্মী মতাগুম চিফ মিনিষ্টরনা, মীয়ামগী ৱাকৎ অমত্তা তাবীদনা প্রোজেক্ট অসী শঙ্গাখিবনি হায়না পেন্দবা ফোঙদোরক্লি।
মচাক-মথূম খূদীঙমক মপূঙফানা পান্সিল্লবা মতূঙদা শঙ্গাবগী থবক চত্থবিয়ু হায়না লূপশিং অসীনা মমাঙদা কয়ারক হন্না হায়জদুনা লাকখি অদূবু ৱাকৎলোয়শিং অদূ মীয়ামগী চাওখৎ-থৌরাংশিং পায়খৎপদা য়ৈখায়-থিঙ্গাইবা কাঙবূনি হায়দুনা অঙাওবা তাহনবিখি হায়রি।
ইন্দিয়া লৈঙাক্কি মিনিষ্ট্রি ওফ জল শক্তিগী মখাদা পায়খৎলিবা ৱাটর সপ্লাই স্কিম অসী জুলাই ২৯ ফাওবগী মনূঙদা থবক লোইশিন্দুনা মীয়ামদা থক্নবা ঈশীং পীদ্রবদি অকনবা খোঙজং চঙশীল্লগনি হায়না অকনবা ৱার্নিং তৌরক্লি।