এম এস এফকি লমজীং মখাদা মহৈরোয়শিংনা খোল্লাউ কয়াগা লোয়ননা ৱাকৎ মীফম চত্থখ্রে

লমদমসিগী ট্রোংলাউবিদা হন্দক চত্থরকখিবা কুকি টেরোরিষ্টশিংগী মীহাৎ-মীপূনগী তমথিরবা এত্তেক য়াওনা মীচম মীয়াম পাক্তক্ননা হাৎপা, মীচমশিংবু হোষ্টেজ ওইনা ফারবা মতূঙ ঙসীফাওবা লংলা-লংজিল খঙহন্দনা লৈহল্লিবা, মীচমশিংগী য়ূম-কৈ কয়ামরুম পাক্তক্ননা মৈ থাবগী থৌওংশিং চত্থরিবা কুকী মিলিটেন্টশিংগী মায়োক্তা অমদি মনিপুরবু ইন্দিয়ানা শরৌ শীন্নদুনা নমদুনা লৌশীনখিবা নুমিত্তগী ঙসীফাওবদা ইন্দিয়ানা মনিপুরিশিংগী মথক্তা থেংখাঙ নাইনা চত্থরক্লিবা মীওৎ-মীনৈ, প্রোক্সি ৱারগী থৌওংশিং য়ানিংদবা ফোঙদোক্তুনা লাক্লিবা মনিপুরি ষ্টুদেন্টস ফেদরেসন (এম এস এফ) কি লমজীং মখাদা মহৈরোয়শিংনা ঙরাংসু অকনবা খোল্লাউ কয়াগা লোয়ননা ৱাকৎ মীফম চত্থখ্রে।
ককচীং দিষ্ট্রিক্টকী মনূঙচন্না লৈরিবা লাংমৈদোং হায়র সেকেন্দরি স্কুলগী কেম্পসতা স্কুল অসীগী মহৈরোয়শিংনা ৱাকৎ মীফম অদূ চত্থখিবনি।এম এস এফ ককচীং দিষ্ট্রিক্ট কম্মিটিনা শীন্দুনা চত্থখিবা মহৈরোয়শিংগী ৱাকৎ মীফম অদুদা খোল্লাউ কয়ামরুম লাউরদুনা য়াম্না অকনবা মওংদা কুকি টেরোরিষ্টশিং, ইন্দিয়ান সেক্যুরিটি ফোর্সেস অমসুং ইন্দিয়া লৈঙাক্কি থৌওংশিং পেন্দবা ফোঙদোকখি।
ঐখোয়বু নীংতম্না হিংহল্লু, ইন্দিয়ান সেক্যুরিটি ফোর্সনা মনিপুরদা হৌজিক চত্থরিবা টেরোরিজমগী থৌওংশিং খূদক্তা লেপ্পু, ইন্দিয়ানা কুকি মিলিটেন্টশিংদা ইন্সীন্দুনা প্রোক্সি ৱার চত্থরিবসি খূদক্তা লেপ্পু, ঐখোয়গী লম ঙাক-শেনবা ঐখোয়গী ইথৌদাংনি,ষ্টেট তেরোরিজম লেপ্পু, ঐখোয় শান্তি পামই, ঐখোয় নীংথীনা মহৈ-মশিন তম্বা পাম্মি হায়বনচিংবা প্লেকার্দ কয়ামরুমসু মহৈরোয়শিং অদূনা শীজিন্নখি।