হৌখিবা কুমশিং ২০০৭ তা লমদেংদা অহানবা ওইনা লিংখৎখিবা সোলিদ ৱেষ্ট মেনেজমেন্ট প্লান্ট অসী নোংমদা ফত্ত-হৌদি টন ২০ লোম রিসাইক্লিং তৌদুনা মৈ পুথোকপগা লোয়ননা অমোৎ-অকায়শিং লোইশিনগনি হায়বা পান্দম থমখিবনি। ঙসীদি মফম অসীদা ফত্ত-হৌদি টন ১৩০ হেন্না তোঙান তোঙানবা মফমশিংদগী পুশিল্লক্লগা পৈখত্তুনা থম্লি অদুবু রিসাইকল তৌবদি লৈত্রি। মৈ পুথোকপগী থৌওংদি লায়রদনা অমোৎপশিং অসি লোইশিন্দনা মতম শাংনা লৈরকপনা অকোয়বদা লৈরিবা মীয়ামগী হকশেলদা অকীবা ফংনা খুদোংথীনিঙায় ওইরক্লে হায়রি।
হীরম অসীগী মতাঙদা পোইন্ট ৭ য়াওবা মেমোরেন্দম অমা,হৌখিবা মার্চ ২৬ তা লৈঙাক অসীগী মফমদা পীখিবদু থবক্তা ওন্থোরক্তবা তারবদি লাক্লিবা জূন অমদগী প্লান্ট অসী মতম চূপ্পগী ওইনা থিংজিল্লগনি হায়রি। ৱাফম অসী ঙরাং সোলিদ ৱেষ্ট মেনেজমেন্ট প্লান্ট কমপ্লেক্স লমদেংদা পাঙথোকখিবা পাউমীশিংগা উনবগী থৌরমদা লমদেং অপূনবা লূপকি এদভাইজর থৌদাম নেত্রজিৎনা ফোঙদোকখিবনি।
লৈঙাক্না থৌশাদ্রবা প্লান্ট অসীনা হৌজিক লৌ পরী ৩০ রোম হেন্না লৌ পানবা য়াহন্দ্রে হায়না মহাক্না ফোঙদোকখি। পাউমীশিংগা উনবগী মীফম অদুদা লমদম অদোমগী ক্লব অমদি মৈরা পায়বীশিংগী মীহুৎ কয়াসু শরূক য়াখি।