চিফ মিনিষ্টরনা কুকি-জো কাউন্সিলগী লুচিংবশিংগা গুৱাহাটিদা উনখ্রে

মনিপুরগী চিফ মিনিষ্টর য়ূম্নাম খেমচান্দনা চৎলিবা থা অসীগী ২১ গী নুমিদাং পুঙ ৭ .৩০ খরা হেল্লকপা মতমদা কুকি -জো কাউন্সিলগী লুচিংবশিংগা গুৱাহাটিদা মীফম পাঙথোক্তুনা ৱাফম কয়া খন্নখ্রে লোয়ননা মনিপুরদা মহৌশাগী ঈং-তপ্পা শক্তম হঞ্জিল্লক্নবা থবক পায়খৎমিন্নসি হায়বা ৱাফম হৌদোকখ্রে।
মনিপুরগী চীঙ অমসুং তম্পাক অনীমক্তা লৈরিবা মীয়ামদা মহাক্কি লৈঙাক্না লৌখৎলক্লিবা মীয়ামগী চাওখৎনবা অমদি য়াইফা -থৌরাংগী স্কিমশিংগী কান্নবশিং চপ মান্ননা য়ৌহন্নবা অখন্ননা মীৎয়েং চঙদুনা থবক পায়খৎলি হায়বা ৱাফম মহাক্না কুকি -জো কাউন্সিলগী লুচিংবশিংগা উনখিবা অদূদা ফোঙদোকখি।চিফ মিনিষ্টরনা মীহূৎশিং অদূগা উনদ্রিঙৈ মমাঙদা গুৱাহাটিগী টাজ বিভান্টা দা থুংখি।
চহী অহুম্লোম ফারক্লবা মনিপুরগী হীঙশাগী ঈরাঙ অসীগী চৈরক্তা মনিপুরগী চিফ মিনিষ্টরনা ইহান হানবা ওইনা কুকি -জো কাউন্সিলগী লুচিংবশিংগা হন্দক উনদুনা শান্তি হঞ্জিলহন্নবা খন্নখিবা অসী য়াম্না শীংথানীংঙাই ওইরবা খোঙথাঙ অমনি হায়নরি। ইন্টরেক্সন অদূ আইস- ব্রিক্কিং সেসন অমনি হায়না কুকি -জো কাউন্সিলগী লুচিংবশিংগা ফোঙদোরক্লি।
চিফ মিনিষ্টরগা উনখিবা কদুদা কুকি -জো কাউন্সিলগী মায়কৈদগী, মনিপুরদা হৌজিক কুকি -জো কাঙবূনা দিমান্দ তৌরিবশিং অসিগী পোলিটিকেল সোল্যুসন অমা পুরক্ট্রিবা ফাওবা বফর জোনশিং অসী ঈকায়খুম্নবগা লোয়ননা ঙাক-শেন্দুনা,মসীগী সেঙ্কটিটি ঙাক্ননবা মরী লৈনবশিংদা খঙহনবি‌য়ু হায়না চিফ মিনিষ্টরদা তকশীনখি। সস্পেন্সন ওফ ওপরেসন (সূ) গী রূলশিং ঙাকপগা লোয়ননা তুংকোইনা সূ চৎনহন্নবা হোৎনবদা মনিপুর লৈঙাক্কি মায়কৈদগীসু অঙম্বা থাক্তা মতেঙ পাংশিনবিনবা কাউন্সিলগী লুচিংবশিং অদূনা চিফ মিনিষ্টর দা তকশীনখি।
মীফম অদূ চপচাবা ৱারেপ অমত্তা লৌদনা লোইশিনখি।