চিফ মিনিষ্টরনা লো এন্দ ওর্দর অমদি চাওখৎ-থৌরাংগী মতাঙদা রিভ্যু তৌখ্রে, কুকি -জো কাঙলূপকা উনগদৌরি

মনিপুরগী চিফ মিনিষ্টর য়ূম্নাম খেমচান্দনা ঙসী গুৱাহাটিদা কুকি -জো কাউন্সিলগী লুচিংবশিংগা মীফম অমা পাঙথোক্তুনা, মনিপুরদা মহৌশাগী ঈং-তপ্পা শক্তম হঞ্জিলহন্ননবা অমসুং চাওখৎ-মায়কৈদা খোঙ থাংজিন্দুনা লমদমসিদা মহৌশাদগী লৈমিন্নরক্লবা কাঙলূপশিংগী য়ূমথোঙ খূদীঙমক্তা মহাক্কি ষ্টেট-লৈঙাক অমদি সেন্টর লৈঙাক্না পায়খৎলক্লিবা য়াইফা থৌরাংগী কান্নবা খূদীঙমক য়ৌহনবা য়াননবগী মতাঙদা খন্নগদৌরি।
কুকি-জো কাউন্সিলগা চিফ মিনিষ্টরগা উননবা ৱাফম অমা চৎলিবা মার্চ থা অসীগী ১৭ তা চিফ মিনিষ্টরগী সেক্রেটরি ওইনা লৈরিবা নৈলিয়েন্থাং তেল্লেন্না কুকি -জো কাউন্সিলগী চ্যেরমেন হেনলিয়ন্থাং থাংলেটতা চেরোল অমা থাদুনা খঙহনখিবনি।মদুদা চিফ মিনিষ্টরনা কাউন্সিল অসীগা উনদুনা মনিপুরদা মহৌশাগী শক্তম হঞ্জিলহল্লকপা য়াননবা পোরমশিং খন্নসি হায়বা ৱাফম ফোঙদোকখি হায়রি।
নাকল অমরোমদা ঙরাং চিফ মিনিষ্টরনা চ্যের লৌদুনা ইম্ফালগী মন্ট্রিপুখ্রীদা লৈরিবা ন্যু সিভিল সেক্রেটরিয়েত্তা অৱাংবা থাক্কি মীফম অমা পাঙথোকখিবগা লোয়ননা হৌজিক লৈরিবা সেক্যুরিটিগী অমসুং লো এন্দ ওর্দরগী ফীভম রিভ্যু তৌখি লোয়ননা আই দি পিশিং মশাগী মহৌশাগী মফমশিংদা হঞ্জিলহন্ননবা সেক্যুরিটি ফোর্স না চঙশীল্লিবা থবক-থৌরমশিং নৌহৌননা য়েংশিনখি। মহাক্কি লৈঙাক্না পায়খৎলিবা অমসুং মতূঙদা পায়খৎলক্কদৌরিবা মীয়ামগী চাওখৎ-থৌরাংগী কান্নবা খূদীঙমক চীং-তম অনীমক্কি মীয়ামদা চপ মান্ননা য়ৌহন্ননবগী মতাঙদসু অৱাংবা থাক্কি মীফমদুদা কূপ্না খন্ন-নৈনখি হায়রি।
মীফমদুদা চিফ সেক্রেটরি পি কে গোয়ল, দি জি পি রাজিব অমদি সেক্যুরিটি এদভাইজর কুলদিপ সিংহসু শরূক য়াখি।