ঐখোয় মীকপ থোক্লসি, সেন্সস পাঙথোকহনগুমসি: এম টি য়ূ

মনিপুরবু ইন্দিয়াগী ফীবান্নুংদা চনশিনখ্রবা মতূঙদা কুমশিং ১৯৫০ দগী ঙসীফাওবদা লমদমসিদা বাংলাদেস অমসুং ম্যান্মার হায়রিবা মনিপুরগা য়ূমথঙনরিবা লৈবাকশিং অসীদগী মীতোপ লাখ কয়া চঙশীল্লক্তুনা আইন কায়না খুন্দাশিন্দুনা লৈহল্লিবসি ইন্দিয়া লৈঙাক্না থৌওইনা মনিপুর অসী তুম্না মাঙহন্ননবা চত্থরকপা অরোনবা এজেন্দা অমা ওইরে হায়বসি ঈরৈচা পূম্নমক্না খঙমিন্নবা মতম ওইরে।
মনিপুরদা মীতোপ- মীয়ান লাখ কয়ামরূম চঙশীল্লক্তুনা খুন্দাশিন্দুনা লৈহল্লবা মতূঙদা হৌজিক য়ূমকোক অমসুং মীকোক থীবগী থবক পায়খৎনবা ইন্দিয়া লৈঙাক্না থবক পায়খৎলক্লিবসি থৌওইনা মনিপুরিশিং মাঙহন্ননবা শীনবা থৌরাং অমনি।মরম অদূনা ঈরৈচা খূদীঙমক্না হৌজিক ঐখোয়গী শক্তম মাঙহন্নবা, ঐখোয়গী কাঙখূল ফাওবা মূত্থৎনবা হোৎনরক্লিবা ফীভম অসী খঙমিন্নবগা লোয়ননা সেন্সসকি থবক-থৌরম খূদীঙমক বোয়কোট তৌমিন্নরসি হায়না মীটৈ (মৈটৈ) ট্রাইব য়ুনিয়ন(এম টি য়ু) না মীয়ামদা খঙহল্লক্লি।
য়ুনিয়ন অসীনা ফোঙদোরকপা মতূঙ ইন্না, হৌখিবা কুমশিং ১৯৭১ দগী ২০১১ ফাওবগী মনূঙদা পাঙথোকখিবা সেন্সস খূদীঙমক্তা ম্যান্মার অমসুং বাংলাদেসতগী মীতোপ লাখ কয়ামরুম মনিপুরদা চঙশীন্দুনা লৈরিবসি ঙসীফাওবা তকথোক্ননবা থৌশীল অমত্তা পায়খৎলক্ট্রিবা অসীগী নুংগী ওইবা ৱাখল্লোন অদূ করি ওইবা য়াবগে হায়বদু মীয়াম্নসু খন্থবিয়ু লোয়ননা মপান্দগী চঙশীল্লক্লগা ঐখোয়গী ঈরমদম মুন্দুনা লৌননবা হোৎনরক্লিবা মীওইশিং অসী তকথোক্ট্রিফাওবা ইন্দিয়া লৈঙাক্না চত্থরক্লিবা সেন্সসকি থবক খূদীঙমক অথীঙবা থম্ননবা হোৎনমিন্নসি হায়রি।