হোষ্টেল শাখিবগী পেন্দিংদা লৈহৌরিবা শেনফম লৈঙাক্না অথূবা মতমদা পীথোকপিয়ু: হোষ্টেল্লর মহৈরোয়শিং

হৌখিবা কুমশিং ২০০৬ তগী হৌনা, মতমদূগী লৈঙাক্তা কেবিনেট মিনিষ্টর অমা ওইনা লৈরম্বা লাইওইখ্রবা মোহম্মদ অল্লাউদ্দিন খানগী অশানবা মীৎয়েং মখাদা শাবা হৌগৎখিবা, ইম্ফাল ইষ্ট দিষ্ট্রিক্টকি মিনুথোং হাফিজ হাট্টাদা লৈরিবা, মনিপুরগী মৈতৈ-পাঙল নূপীমচা মহৈরোয়শিংগী ওইনা লমদমসিদা অমত্তা ঙায়রবা মুস্লিম গার্লস হোষ্টেল অসী শাবা লোইরদুনা শঙ্গাখিবা মতূঙ চহী ১৫ হেল্লফাওবদা লৈঙাক্না মরী লৈনবা কন্ট্রেক্টরশিংদা বিল পীথোক্তনা থম্বিরিবা অসী য়াম্না হৌনদবা অমনি। কন্ট্রেক্টরশিংগী অৱাৎপা শেনফম অয়াম্বা ঙসীফাওবা পীথোক্তনা চহী কয়া লীশাঙ শীৎনা থম্লক্লিবা অসীগী মতাঙদা মনিপুরগী নৌনা চিফ মিনিষ্টর ওইরক্লবা,পূকচেল চাউরবা অমসূং অচান- মীরায় নাইদবা য়ূম্নাম খেমচান্দনা অথূবা মতমদা মীৎয়েং চঙবীদুনা অৱাবা মায়োক্নদুনা লাক্লবা কন্ট্রেক্টরশিং অসীগী বিল শেংদোকপীয়ু হায়না হোষ্টেল অসীদা লৈরিবা মুস্লিম কাঙলূপকি মহৈরোয় নূপীমচাশিংনা চিফ মিনিষ্টরগী মীৎয়েং চিংশিল্লক্লি।
ঙরাং হোষ্টেল অসীদা পাঙথোকখিবা পাউমীশিংগা উনবগী থৌরমদা মহৈরোয় নূপীশিং অদূনা ৱাফম অসী ফোঙদোক্তুনা চিফ মিনিষ্টরগী পূক্নিং চিংশিল্লকখিবনি। থৌরমদুদা শরুক য়াখিবা, হোষ্টেল অসী শাখিবদা য়াওবা সব-কন্ট্রেক্টর এল তোম্বনা হায়, হোষ্টেল অসী হৌখিবা কুমশিং ২০০৬ তগী মহাক মশামক য়াওনা সব-কন্ট্রেক্টর অহূম্না অরৈবা শেনফম পুথোক্নরগা শাখিবনি। শেনফমগী অৱাৎপা কয়ামরুম মরূপ-মপাঙশিংদগী পূরুরগা হোষ্টেল অসী শাবা লোইশিনখিবনি হায়না থমখি।
হোষ্টেল অসী কুমশিং ২০১০ দা মতমদুগী এ আই সি সিগী প্রসিদেন্ট ওইনা থৌ পুখিবী সোনিয়া গান্ধী মশামক লাক্তুনা ইম্ফালগী সিটি কনভেন্সন সেন্তর, ন্যু সেক্রেতরিয়েৎকা লোয়ননা পূন্না শঙ্গাখিবনি।
মনিপুরগী অনৌবা লৈঙাক অসীদা মীয়াম্নসু অনৌবা আসা কয়া তৌনরিবনি। লৈঙাক্না মতম কুইরক্লবা বিল অসি পীথোক্নবা থবক লৌখৎপিয়ু হায়না তোম্বনা আপিল তৌখি।
মমাঙগী চিফ মিনিষ্টর ওক্রম ইবোবিগী মতমদা চেরোল কয়া পীদুনা বিলগী শেনফম অসী পীবিননবা হায়জখ্রবসু থবক্তা ওন্থোকপিরমদে। মদূগী তুংদা বিরেন লৈঙাক্তা অমুক হন্না চেরোল কয়া পীদুনা হায়জরবসু থৌৱা শাবিখিদে। ঙসীদি মীয়ামগী খনবা চিফ মিনিষ্টর খেমচান্দ লাক্লবনিনা অৱাবা তারবা কন্ট্রেক্টরশিং অসিগী য়েংবিদুনা বিল অসীগী শেনফম পীথোকপিয়ু হায়খি।