মনিপুরগী অমত্তা ঙায়রবা, ইম্ফাল ইষ্ট দিষ্ট্রিক্টকি মনূঙচন্না পাঙ্গৈ হাওটলদা লৈরিবা সাইনিক স্কুলগী ফীভম ঙরাং চিফ মিনিষ্টর য়ূম্নাম খেমচান্দনা চত্তুনা য়েংশিনখ্রে।মহাক্না স্কুল অদূদা থুংলখিবদা খূরায় এসেমব্লী কন্সটিট্যুয়ন্সিগী এম এল এ লৈশাংথেম সুসিন্দ্রো, সাইনিক স্কুলগী প্রিন্সিপাল কর্ণেল এ রাজিব অমসুং স্কুল অসীগী সেনিয়র ওফিসিয়েলশিং না তরাম্না ওকখি।
স্কুলগী প্রিন্সিপাল রাজিভনা হৌজিক লৈরিবা অৱাৎ-অপা কয়াগী মতাঙদা চিফ মিনিষ্টরদা ব্রিফিং অমা পীখি। মহাক্না হৌজিক স্কুল অসীগী ওইনা মহৈরোয় নূপীমচাশিংগী হোষ্টেল শাবা লোইশিন্দনা লৈরিবা, ৱাল ফেন্সিং শেমজীনবগী তঙায়ফদবশিং, ঈশীঙগী অৱাৎপা লৈরিবা অমদি অতৈ খুদোংচাদবা লৈরিবশিংগী মতাংদা চিফ মিনিষ্টর দা পাউদমখি।
প্রিন্সিপালগী ৱাফমশিং অদু তারবা মতূঙদা মহাক্কি মায়কৈদগী মরী লৈনবা অথোরিটিগা তানরগা অথূবা মতমদা স্কুল অদূগী অৱাৎপা খূদীঙমক মেন্সিন্ননবা থবক পায়খৎকনি হায়না অচেৎপা ৱাফম ফোঙদোক্লমখি। চিফ মিনিষ্টরনা ইম্ফাল-পাঙ্গৈ লম্বী শেম্বগী থবক তৌরিবা ওফিসিয়লশিংদা, লম্বী অসী নোংজুথা মমাঙদা লোইশিন্দুনা মীয়াম্না হৌজিক মায়োক্নরিবা চৎথোক-চৎশীনগী খুদোংচাদবশিং অসী কোকহন্ননবা হোৎনগদবনি হায়না অকনবা পাউতাক পীরমখি।