গর্লস হোষ্টেল শঙ্গাখিবা চহী ১৫ হেল্লবা মতমসিফাওবা লৈঙাক্না বিল পীথোক্তবসি লাইবক থীবনি:এল তোম্বা

অদূঙৈ কুমশিং ২০১০ দা মপূঙ ফানা শাবা লোইরদুনা মতমদুগী এ আই সি সিগী প্রসিদেন্ট ওইনা লৈরম্বী কংগ্ৰেস লিদর সোনিয়া গান্ধী মশামক লাক্তুনা হকথেঙননা শঙ্গাখিবা, অদুগা মতমদুদগী মুস্লিম কাঙলূপকি মহৈরোয় নূপীমচা কয়ামরুমগী হোষ্টেল অমা ওইনা চঙজফম পীদুনা লৈরক্লিবা, ইম্ফাল ইষ্ট দিষ্ট্রিক্ট কি মিনুথোং হাফিজ হট্টাদা লৈবা, মনিপুরগী অমত্তা ঙায়রবা মুস্লিম গার্লস হোষ্টেল অসীবু শাখিবা কন্ট্রেক্টরশিংগী বিল ঙসী ফাওবা লৈঙাক অসীনা পীথোক্তনা লৈরি।মসীমক্তি কা হেনমনবা থৌওং অমনি, য়াম্না লাইবক থীবনি হায়না হোষ্টেল অসী শাবদা মরূওইবা থৌদাং লৌখিবা সব-কন্ট্রেক্টর এল তোম্বনা য়াম্না কন্না পেন্দবা ফোঙদোকখ্রে।
ঙরাং মহাক্না অখন্ননা পাউমী খরগা উনখিবা মতাঙ অমদা ৱাফম অসী ফোঙদোক্লদুনা হায়, লৈখিদ্রবা হান্নগী মিনিষ্টর মোহম্মদ অল্লাউদ্দিন খানগী মীৎয়েং মখাদা মতমদূগী মনিপুরগী লুরবা তাঞ্জাদা মাইনোরিটি মুস্লিম কাঙলূপ অসীগী মনূঙদা অমূকসু কা হেন্না শোত্থনা লৈরিবা মহৈরোয় নূপীমচাশিংগী ফীভম খরদা ওইরবসু ফগৎহন্নবগী পান্দমদা লিংখৎখিবা মুস্লিম গার্লস হোষ্টেল অসীবু মপূঙফানা শাগৎনবা হোৎনবদা সব-কন্ট্রেক্টর অহুম্না মশা-মশাগী লৈজবা শেনফমশিং পুথোক্তুনা থবক পায়খৎখিবনি।
মমৈথঙদা শেনফম কোন্নরক্তবদগী মরূপ-মপাঙ কয়াদগী পূরুরগা হোষ্টেল অসী য়াম্না ৱানা হোৎনদুনা শাবা লোইশিনখিবনি।মসীগী বিল পীথোকপিদুনা সব-কন্ট্রেক্টর শিংনা মায়োক্নরিবা শেল-থুমগী অৱাবা খুদোংচাদবা কয়ামরুম অসী কোকহনবিয়ু হায়দুনা মমাঙগী চিফ মিনিষ্টর ওইরম্বা ওক্রম ইবোবি অমসুং নোংথোম্বম বিরেন অনীদা অইবা চেরোলশিং পীশিন্দুনা কয়ারক হায়জদুনা লাক্লবসু থবক ওইনা পাঙথোকপিরমদ্রে হায়বা ৱাফম তোম্বনা ফোঙদোকখি।
হৌজিক অনৌবা অমদি মীচঙ-মীখায় নাইদবা চিফ মিনিষ্টর য়ূম্নাম খেমচান্দ না অখন্নবা মীৎয়েং চঙবিদুনা অৱাবা মায়োক্নরবা কন্ট্রেক্টরশিং অসিগী বিল অথূবা মতমদা পীথোকপিয়ু হায়না তোম্বনা চিফ মিনিষ্টর গী পূক্নিং চিংশিনখি।