কেরলা ষ্টেটকি সোরনুর লমদমদা লৈরিবা অনুরাগ সিনেমা দা ঙরাংদগী হৌরগা চৎলিবা ফেব্রুয়ারি থা অসীগী ১০ ফাওবা চত্থগদৌরিবা ইন্দিয়াগী ওইনা ইহান হানবা দিজিটেল ভিদিও দোক্যুমেন্টরি ফীল্ম অমদি সোর্ট ফীল্ম ফেষ্টিবেল দা লমদম অসিগী শক্নায়রবা ফীল্ম মেকর অমসুং প্রদ্যুসর হাওবম পৱনকুমারসু জ্যুরি চ্যেরমেন ওইননবগীদমক খল্লক্লে।
ফেদরেসন ওফ ফীল্ম সোসাইটিজ ওফ ইন্দিয়া কেরলা রিজন্না, কেরলা ষ্টেট কলাচিত্র একাদেমিগা খূৎশম্নরগা পাঙথোক্লিবা ফীল্ম ফেষ্টিবেল অসীদা দোক্যুমেন্টরি ফীল্ম ১৪ অমসুং সোর্ট ফিল্ম ১৭ কম্পিটিসন সেক্সনদা ঊত্তুনা অথোয়-অহেন চাংদম্নগনি।
মসীগীসু মথক্তা নোন-কম্পিটিসন সেক্সন্দা দোক্যুমেন্টরি ফীল্ম ২৮ অমসুং সোর্ট ফিল্ম ২৪ ঊৎকদৌরি। ফেষ্টিবেল অসীগী বেষ্ট দোক্যুমেন্টরি অমদি বেষ্ট সোর্ট ফিল্ম এৱার্দ তা শেল ওইনা লূপা লীশীং ৫০ গা লোয়ননা শেঞ্জেংনা শাবা মুর্তি অমা অমসুং সাইটেসন অমসু য়াওরি।
