অনৌবা মনিপুর লৈঙাক্তা মৈতৈ-পাঙলগী এম এল এ অমদা কেবিনেট মিনিষ্টর পীগদবনি:এম এম দব্লিয়ু ও

চিফ মিনিষ্টর ৱাই খেমচান্দনা লুচিংবা অনৌবা মীয়ামগী লৈঙাক অমা হৌজিক মনিপুরদা লৈরবনিনা ইনক্লুসিব ওইবা লৈঙাক-সাসন অমা মীয়ামদা পীবা ঙম্লগনি হায়বগী অচেৎপা থাজবা লৈরে হায়না মনিপুর মৈতৈ -পাঙল ৱেলফ্যের ওর্গানাইজেসন ( এম এম দব্লিয়ু ও) না অপেনবা ফোঙদোরকখিবগা লোয়ননা ইনক্লুসিব লৈঙাক অসীদা কুকি -জো কাঙলূপকি এম এল এ অমদি নাগাগী এম এল এ দা মান্নবা মীৎয়েং থমদুনা কেবিনেট মিনিষ্টর গী ফমশিং থিন্দোক্লিবা অসীগা মান্ননা মনিপুর তম্পাক্তা খ্বাইদগী মশীঙ য়াম্বা মাইনোরিটি ফূরুপ অমা ওইনা লৈরিবা মৈতৈ-পাঙলগী এম এল এ অমদা কেবিনেট মিনিষ্টরগী ফম পীবিয়ু হায়না ওর্গানাইজেসন অসীগী মায়কৈদগী মনিপুর লৈঙাক্কি মীৎয়েং চিংশিনখ্রে।

ঙরাং ইম্ফালদা লৈরিবা মনিপুর প্রেস ক্লাবতা পাঙথোকখিবা পাউমীশিংগা উনবগী থৌরম অমদা এম এম দব্লিয়ু ও গী প্রসিদেন্ট এম এ চেশাবনা ৱাফমশিং অসী ফোঙদোকখিবনি। মহাক্না হায়, হৌখিবা কুমশিং ২০১৭ তা বি জে পিনা লুচিংবা এন দি এ লৈঙাক অমা মনিপুরদা লৈরকখিবা মতমদুদগী ঙসীফাওবদা মৈতৈ-পাঙল ফূরূপকি এম এল এ অমত্তদা মিনিষ্টরগী ফম পীরকখিদ্রি। প্রাইম মিনিষ্টর নরেন্দ্র মোদিনা লুচিংবা সেন্টরগী এন দি এ লৈঙাক্কি সবকা সাথ, সবকা বিকাস,সবকা বিশ্বাস হায়বা অদূগী ৱাহন্থোক লৈহন্সি হায়রবদি কাঙলূপ পূম্নমক্কি থম্মোই জয় তৌবা ঙম্বা, মীয়ামগী লৈঙাক অমা থম্লবা মতমখক্তদা ওইথোকপা ঙমগদবনি হায়খি।

মনিপুরদা এনিমেটেদ সস্পেন্সন লৌথোকখিদুনা মীয়ামগী লৈঙাক অমা লৈরকপা অসীগা লোয়ননা হৌজিক মীয়াম্না মায়োক্নরিবা অৱাবা খুদোংচাদবা কয়া অসীগী ৱারোয়শিন অথুবা মতমদা পুরক্তুনা লমদমসিদা শান্তি হঞ্জিল্লকপা ওইরসনু হায়নসু চেশাবনা মখাতানা ফোঙদোকখি।