য়ূম্নাম খেমচান্দনা মনিপুরগী চিফ মিনিষ্টর ওইরে, সস্পেন্দেদ এমিমেসন লৌথোকখ্রে, কেবিনেট মীফম পাঙথোকখ্রে

চহী অনীগা থা মাপন শুরক্লবা মনিপুরগী হীঙশাগী ঈরাঙ মরকশিদা তঙদূ-লৈতাদবা ফীভম অমা মায়োক্নরগা লৈরক্লিবা চৈরক্তা মমাঙগী চহী ২০২৫ গী ফেব্রুয়ারি ১৩ দগী থম্লকখিবা সস্পেন্দেদ এমিমেসন অদূ মনিপুরদগী ঙরাং নুংথিল লৌথোকখ্রে। নুমিৎ খরনি ন্যু দিল্লিদা বি জে পিগী নেস্নেল লিদরশিংনা কৌরকপদগী চৎলুবা মনিপুরগী বিজেপি অমসুং মপাঙ ওইরিবা পার্টিশিংগী এম এল এশিং ঙরাং হল্লকখ্রবা মতূঙদা অনৌবা মীয়ামগী লৈঙাক অমা শেমজরগে হায়না লোক ভবন্দা চঙদূনা ষ্টেক ক্লেম তৌখি। মদূগী মতূঙ ঙাইহাক লৈরগা হোম মিনিষ্ট্রিনা মনিপুরদগী সস্পেন্দেদ এমিমেসন লৌথোক্লে হায়বগী চেরোল অমা থাদোরকখিবনি।

লোক ভবন্দা শীঙজমৈ কেন্দ্রগী এম এল এ সু ওইরিবা, হন্দক ন্যু দিল্লিদা মনিপুর বি জে পি লেজিসলেচর পার্টিগী লুচিংবা ওইনা খল্লকখ্রবা য়ূম্নাম খেমচান্দ মনিপুরগী ১৩ শুবা চিফ মিনিষ্টর ওইনা ৱাশক লৌখি।মনিপুরদা অমুক্তা থোকখিদ্রিবা, অঙকপা থৌওং অমা ওইনা বি জে পিগী লুচিংবি অমদি কাংপোকপী কেন্দ্রগী এম এল এ নেমচা কিপগেন কেবিনেট মিনিষ্টর ওইনা, ন্যু দিল্লিদা লৈবা মনিপুর ভবন্দগী ভর্চুএল ওইনা ৱাশক লৌখি। মাও এসেমব্লী কন্সটিট্যুয়ন্সিগী এম এল এ লোসি দিখোসু কেবিনেট মিনিষ্টর ওইনা ৱাশক লৌখি।

টার্ম তরেৎলক থংন-থংননা বিষ্ণুপুর কেন্দ্রগী এম এল এ ওইরক্লিবা গোবিন্দাস কোন্থৌজম অমসুং ৱাঙ্গোই কেন্দ্রগী এম এল এ খূরাইজম লোকেনসু কেবিনেট মিনিষ্টর ওইনা ৱাশক লৌখি। হয়েং ইরাই নুমিৎ, ফেব্রুয়ারি ৬ তা খেমচান্দনা লুচিংবা লৈঙাক অসীদা এম এল এশিং না কদায় ফাওবা থাজরিবগে অমদি শৌগৎলিবগে হায়বদূ খঙননবগীদমক মনিপুর লেজিসলেটিব এসেমব্লিগী হোলদা মপাঙ্গল চাংয়েং তৌগদৌরি।

ঙরাং দিল্লিদগী ইম্ফালদা লাকখিবা এম এল এশিং গী কাঙবূ অদুদা এল এম খৌটে অমদি ঙুরশাংলুর সনাতে, হায়রিবা কুকি এম এল এ অনী অসীসু য়াওরকখি। মখোয় অনীমক অকি-তুজুংবা অমত্তা য়াওদনা ৱাশক লৌবগী থৌরমদুদা শরূক য়াখি। য়ুম্নাম খেমচান্দনা লুচিংবা মনিপুর লৈঙাক্কি অহানবা কেবিনেট মীফম ঙরাং নুমিদাং পুঙ ৭ তাবদা পাঙথোকখি।