সেন্সস য়ৈথোক্নবা মনিপুরগী এম পি অহুম্না পার্লিয়ামেন্ত সেসন্দা পুখৎফম থোকই: জিটেন্দ্র

মনিপুরদা হৌজিক মপানলমদগী আইন কায়না মীতোপশিং চঙশীল্লক্তুনা লমদম অসীগী দেমোগ্ৰাফি,কলচর, ইকোনোমি,রাজনিটি,টেরিটোরিয়ল ইন্টিগ্ৰিটি নচিংবা হীরম কয়াদা অচৌবা শাফূ অমা পীরক্লিঙৈ চৈরকশিদা এন আর সি নত্রগা মসীগা মান্নবা কাঙলোন অমা চপচানা শেমদূনা মীতোপশিং খন্দোক্লগা মশা-মশাগী মরমদমশিংদা হলহনখিবা মথৌ তারি।

মীতোপ্না মশীঙ য়াম্না চঙশীল্লক্তুনা মখোয়খক্তগী ওইবা অপূনবা মপাঙ্গল শাগৎলক্তুনা মনিপুরবু মচেৎ তানা থুগাইরগা মীতোপশিংগী তোঙানবা লমদম অমা শেমগৎনবা থৌরাং তৌরক্লিবগী চৈরকশিদা মনিপুরদা মীকোক থীবা, য়ূমকোক থীবগী থবক অমত্তা চত্থবা য়াখিরোই।হৌজিক লৈরিবা মনিপুরগী ফীভম অসী মুন্না খঙলবা ঐখোয়গী এম পি অহুম্না হৌজিক চত্থরিবা পার্লিয়ামেন্তগী বদজেট সেসন অসীগী খুদোংচাবা লৌরগা মনিপুরদা সেন্সসকা মরী লৈনবা থবক-থৌরম অমত্তা পায়খৎতনবা ৱাফমশিং পুখত্তুনা কন্না য়েৎকদবনি, মতাঙ-মতম চাদ্রিঙৈদা য়ূমকোক অমদি মীকোক অমত্তা মশীঙ থীবা য়াহল্লোইদবনি হায়না কেম্পেইন জষ্ট এন্দ ফ্যের দিলিমিটেসন গী কনভিনর জিটেন্দ্র নিঙোম্বনা অকনবা ৱাফম ফোঙদোকখ্রে।

পাউমীশিংদা ৱা ঙাঙবদা মহাক্না হায়, হীরম অসীগী মতাঙদা হৌখিবা দিসেম্বর ১৫ দা প্রাইম মিনিষ্টর নরেন্দ্র মোদিগী মফমদা,  হৌজিক মনিপুরদা সেন্সস পাঙথোকপদা খুদোং চারোইদবগী মরমশিং য়াওরবা মেমোরেন্দম অমা পীশীনবা লৈখ্রে।মদূগা মান্নবা ৱারোল য়াওবা মেমোরেন্দম অমদি অতোপ্পা মেমোরেন্দম কয়াসু মনিপুরগী গভর্নর অজয় কুমার ভাল্লাদা থেঙ্খাং কয়ারক্তা পীশীনবা লৈখ্রে হায়বা ৱাফম মহাক্না থমখি। মসীগীসু মথক্তা হৌখিবা,মমাঙ চহীগী দিসেম্বর ১৭ তা মনিপুর লৈঙাক্কি মখাদা লৈরিবা সেন্সস দিরেক্তরেত্তা চত্তুনা, মীকোক থীবা অমদি য়ূমকোক থীবগী থবক অমত্তা চত্থদনবা চেরোল পীদুনা খঙহনখ্রে।পূম্নমক অসীগী মতূঙদা হৌখিবা চহী ২০২৫ গী দিসেম্বর ২৭ তা পোলিটিকেল পার্টি পূম্নমক্কি ওইবা মীফম পাঙথোক্তুনা এন আর সি নত্রগা মসীগা মান্নবা কাঙলোন অমা চৎনহন্দ্রিবা ফাওবা সেন্সসকি থবক অমত্তা পায়খৎহন্দনবা অপুনবগী ৱারেপ লৌখিবসু লৈখ্রে হায়না মহাক্না ফোঙদোকখি।