টেক্স বূক ফংহন্দবগী মায়োক্তা দেসামগী থৌমীশিংনা বোসেম ওফিসতা থোমজীনখ্রে

মনিপুর লৈঙাক্কি দিপার্টমেন্ট ওফ ইদুকেসন- এস না হৌখিবা জনুৱারি ১৫ দা নোটিফিকেসন অমা থোক্তুনা, জনুয়ারি ১৯ দগী মনিপুরদা লৈরিবা স্কুল পূম্নমক্তা ক্লাস ৱান্দগী টেন ফাওবগী ওইনা অনৌবা একাদেমিক সেসন অসীগী ক্লাস হৌননবা খঙহনখিবগী মতূঙ ইন্না নোর্মেল ক্লাস হৌখ্রবসু ঙসীফাওবা মহৈরোয়শিং অসিদা টেক্সবূক অমত্তা ফংহনবা ঙমদ্রি। মসীগী মরূওইবা মরমদি স্কুল ইদুকেসনগী কম্মিস্নার য়াওনা মকোকথোংবা ওফিসিয়লশিংনা মাগী মাগী খূৎচাবী ফার্মশিংদা লাইরিক নম্ননবা সপ্লাই ওর্দর পীননবা হোৎনবদা অমত্তা ওইবা ৱারেপ লৌবা ঙমদবা,থবক পায়খৎপদা চয়েৎনবা থোক্লকপদগীনি হায়না দেমোক্রেটিক ষ্টুদেন্টস এল্লায়ন্স ওফ মনিপুর (দেসাম) গী প্রসিদেন্ট সোমোর্জিটনা ফোঙদোকখ্রে।

মহৈরোয়শিংদা টেক্সবুক খূদক্তা ফংহল্লু, মহৈরোয়শিংগা মরী লৈনবা থবক-থৌরমশিংদা শেঞ্জা-থুমজা চত্থগনু, ক্বালিটি লৈতবা, সব-ষ্টেন্দর্দ ওইবা চে শীজীন্নরগা লাইরিক নম্বা য়ারোই হায়বা ৱাফমশিং পুখত্তুনা দেসামগী মশীঙ য়াম্লবা থৌমীশিংনা ঙরাংসু মখাতানা বোসেমগী ইম্ফালদা লৈরিবা ওফিষ্টা থোমজীনখ্রে। ক্লাস ৱানদগী আইট ফাওবগী ওইনদি মমাঙদগী হৌনা লৈঙাক্না মহৈরোয়শিংদা লেম্না টেক্সবূক ফংহনবা হায়বা কাঙলোনগী মখাদা মরী লৈনবা জেট ঈ ওশিংগী খূত্থাংদা লাইরিক লেম্না পীদুনা লাক্লবসু হন্দক্কি ওইনদি হৌজিক ফাওবদা মহৈরোয়শিংদা টেক্সবুক অমত্তা পীরকপা লৈত্রি হায়না দেসামগী প্রসিদেন্ট সোমোর্জিটনা পেন্দবা ফোঙদোকখি।

দেসাম্না ঙাইহাক পঙলাও লাউরম্লগা তোকচখিগনি খল্লোইদবনি। মহৈরোয়শিংদা টেক্সবুক খূদক্তা ফংহল্লু। মসীদা লৈঙাক্কি মায়কৈদগী থৌশারক্তবা তারবদি মৈহৌ-লাংপোক য়াওবা খোঙজঙ লাক্কনি হায়না মহৈরোয় লূপ অসীগী মায়কৈদগী অকনবা ৱার্নিং তৌখি।