বিষ্ণুপুর দিষ্ট্রিক্টকি মনূঙচন্না লৈরিবা খা পোৎশঙবমদা শঙাই রিজোর্ট হায়না মিংথোনবা, নহা-অহল খায়দনা অৱা-পোত্থাবগী মফম ওইরগদবা রিজোর্ট অমা হাংদোকখ্রে।
খাংপোকশঙ, ঈশীঙগী পার্ক অমদি শান্নবূঙ য়াওনা অতৈ অতৈ রিক্রিয়েসনগী মফম কয়ামরুম য়াওরবা পার্ক অসীনা মহৌশাগী চীঙ-পাৎ, তুরেল, অহাঙবা লমজাউ-লমহাংশিং অমসুং লম্লক্কি নাপী-শীংনা,উচেকশিংগী মরক্তা মীওইবনা ঈঙনা-চীক্না লৈমিন্নবগী মপান নাইদ্রবা পূক্নীঙগী নুঙাইবদু ফংবা ঙমহল্লগনি হায়বগী থাজবা পোকই হায়না রিজোর্ট অদুবু হাংদোকপগী রিব্বোন ককখিবা বিষ্ণুপুর কেন্দ্রগী এম এল এ গোবিন্দাস কোন্থৌজম্না অপেনবা ফোঙদোকখি। অঈঙ-অশাগী খল কায়থরকপগী চৈথেং মায়োক্নবা হৌরক্লিবা মালেম অসীদা ঐখোয়না উমং-ৱামঙ য়োকখত্তুনা,মহৌশাগী খল ঙাক্তুনা থম্ননবা হোৎনবদা রিজোর্ট অসিনা অচৌবা থৌদাং অমা লৌরগনি খল্লুবদা নুঙাইবা ফাওই হায়না থৌরমদুদা অথোয়বা মীথুংলেন ওইনা শরুক য়াখিবা এম এল এ গোবিন্দাসনা মখা তাখি।
মালেমগী অতোপ্পা মফম অমত্তদা ফংদ্রবা, মনিপুরবু মালেমদা মশক তাকপদা খ্বাইদগী মরূওইবা থৌদাং লৌরিবা তাঙলবা, শঙাই হায়না খঙনরবা ঐখোয়গী শজী মখল অসীগী মমীঙ লৌদুনা রিজোর্ট অসীগী মিং শঙাই রিজোর্ট হায়না মিংথোনবা অসিমক পূক্নিং দা মনিপুরি অমা ওইনা চাউথোকচবা ফাওই হায়না থৌরমদুদা শরুক য়াখিবা ৱায়েল কাটি পাউচেগী এদিটর হেমন্তকুমার নিঙোম্বনা ফোঙদোকখি।