বংলাদেশ নৌনা অমুক মৈ চাকখৎলক্লে

বংলাদেশতা মীয়াম্না মমাঙথক্তা হৌরকখিবা ঈহৌ অমদি খোঙজঙশিং অদূদা লুচিংখিবনি হায়বা,শরিফ ওসমান হাদি কৌবা মহৈরোয় অমা শকখঙদবশিংনা হাৎলম্বদগী লৈবাক অদূদা নৌহৌননা,লাকশীনবা ঙমদ্রবা ঈরাঙ হৌরকপদগী হীঙশাগা লোয়ননা পাক সন্না মৈ চাক্লে। ঙরাং মশীঙ য়াম্লবা মীওই লীশীং কয়ানা কেপিটেল সিটি ধাকাদা লৈবা সাহবাগ তা তিন্দুনা হাদি লৈখিদবগী অৱাবা ফোঙদোকখি।
মদূগী থংনবা মীকূপ খরগী মনূঙদা মীয়াম অদূ লাক্ন-ফানবা য়াদবা ফীভমদা ঈরাঙ হৌরক্তুনা লৈঙাক্কি লোয়শঙশিং,মরূওইবা পাউচেশিংগী ওফিস -বিল্ডিংনচিংবদা চঙশীল্লক্তুনা মৈ থাবা,থুগাই-য়ৈখায়বগী থৌওংশিং চত্থরকখি।পোলিটিকেল পার্টিগী ওফিসশিংদসু মীয়াম অদূনা থোমজীল্লক্তুনা চাউনা অমাঙ-অতা থোকহনখি।
বংলাদেশকি য়াম্না মরুওইবা পাউচে অমা ওইরিবা প্রোথোম আলো গী ওফিসতা চঙশীল্লক্তুনা অমাঙ-অতা থোকহনখি।দি দেইলি ষ্টার কৌবা মরুওইবা পাউচে অদূগী ওফিস বিল্ডিংসু থুগাইখিবগা লোয়ননা মৈ থাদোকখি।ফায়র ফায়তরশিং খোঙলৈ থুনা চঙশীল্লক্তুনা বিল্ডিং অদূগী মনূঙদা লৈখ্রবা জর্নেলিষ্ট ২১ কলহৌবা ঙমখি।চিত্তাগোংদা লৈরিবা ইন্দিয়াগী এসিষ্টেন্ট হায় কম্মিসনগী ওফিস বিল্ডিংদসু মীয়াম অদূনা চঙশীল্লক্তুনা অকনবা এত্তেকশিং চত্থরমখি।মখোয়না বংলাদেশকি হান্নগী প্রাইম মিনিষ্টর শৈখ হসিনা অমসুং য়ূমথঙনরিবা ইন্দিয়াগী মায়োক্তসু খোল্লাউ কয়ামরুম লাউখি।
ধনমোন্দিদা লৈরিবা বংলাদেশকি ইহান-হানবা প্রেসিদেন্ট ওইরমখিবা,লৈখিদ্রবা শৈখ মুজিবুর রাহমানগী ময়ূমদসু এত্তেক চত্থদুনা অমাঙ-অতা কয়ামরুম থোকহনখি।লৈবাক অদূগী চিফ এদভাইজর মোহম্মদ য়ুনুসনা ঙসী দিসেম্বর ২০ দা হাদি লৈখিদবগা মরী লৈননা লৈবাক কি থাক্তা অৱাবা ফোঙদোক্লগনি হায়না মীয়ামদা লাউথোকখি।