মহাত্মা গান্ধী নেস্নেল রুরেল এমপ্লোইমেন্ট গরেন্টি স্কিম (এম জি এন আর ই জি এস) বু ভিক্সিট ভারত জি রাম জি হায়না ওন্থোক্কনি হায়বা,বি জে পিনা লুচিংবা এন দি এ লৈঙাক্কি থৌরাংবু ওপ্পোজিসন লিদরশিংনা য়াম্না কন্না য়েত্তূনা য়ানিংদবা ফোঙদোক্তুনা লোক সভাদা চরাঙনখিবা তাল্লক্তা ঙরাং জি রাম জি হায়না খঙনরবা বিল অদূ লোক সভানা পাস তৌখ্রে।
মসীগা লোয়ননা চহী ২০ হেল্লক্লবা,য়ু পি এগী লৈঙাক্না চৎনহনখিবা এম জি এন আর ই জি এস কি মমীং হোংদোকখ্রগনি অদূগা মরূ ওইবা থবক-থৌরম ৪ দা পান্দম থমদুনা ভিক্সিট ভারত-২০৪৭ গী মীৎয়েংদা থবক পায়খৎলগনি হায়রি।অনৌবা থৌরাং অসীগী মপূঙফাবা মমীংদি ভিক্সিট ভারত গরেন্টি ফোর রোজগার এন্দ অজিবিকা মিসন (গ্ৰামিন) হায়না খঙনরগনি।
মসীনা খুঙ্গংগী য়ূমথোঙ খূদীঙদা চহী অমদা নুমিৎ ১২৫ থবক ফংহল্লগনি।হান্নদগী লৈরক্লিবা স্কিম অসীগী মখাদনা পান্দম ঈয়াও-য়াওদনা য়ূমথোঙ অমদা নুমিৎ চাম্মা খক্তমক থবক ফংহল্লম্বনি।অনৌবা মমীং অসীগী মখাদা পান্দম মরিদা মীৎয়েং থম্লগা থবক পায়খৎকদৌরি। মখোয়শিং অদুদি – কোর রুরেল ইনফ্রাষ্ট্রকচর, লাইবলিহুদকা মরী লৈনবা ইনফ্রাষ্ট্রকচর শেমগৎপা,ঈশীঙ কায়না ফংহনবা অমসুং ঈশীঙ-নুংশিৎকি ফীভম ফগৎহন্নবা হোৎনবা অসিনি।