রেলৱে প্রোজেক্টকি টন্নেল হুৎলকপদগী চীঙয়াগী খুল কয়াদা ঈশীঙগী অৱাবা মায়োক্নরে

জিরিবাম-ইম্ফাল রেলৱে প্রোজেক্ট অসী মরূওইনা হৌখিবা কুমশিং ২০১৬ কি মতমদগী খূমাঙ য়াঙশীন্না চঙশীল্লকখিবগা লো‌য়ননা চহী অদুদগী হৌরগা প্রোজেক্ট অসীগী শরুক অমা ওইনা টন্নেল হূৎপা হৌরকখিবদগী চীঙয়াদা লৈবা খুঙ্গং কয়ামরুম ঙসীদি ঈশীঙগী অৱাবা খম থেংনা মায়োক্নরক্লি। ঈম্ফালদগী কিলোমিটর ১৬-১৭ লোম নোংচুপ পাংনা চৎলগা লৈরিবা তাইরেনপোকপী,অতোং খূমন,সাইরেম্নচিংবা খুল কয়া ঈশীং ফংদবদগী খম থেংনা অৱাবা মায়োক্নরে।তাইরেনপোকপী খূলগী মনীঙথংবা চীঙগী শরুক্তা রেলৱে প্রোজেক্ট কা মরী লৈননা টন্নেল হূৎপগী থবক পায়খৎপা হৌরকপদগী তাইরেনপোকপী মনীঙদা লৈরিবা নিংথৌরোক হায়না খঙনরিবা লোক অসিদগী চেন্থরকপা ঈফূৎকি ইশীং লাকপগী চাং য়াম্না হন্থরকপনা খুঞ্জাশিং ঙসীদি অৱাবা মায়োক্নরকপনি।

অদুঙৈ কুমশিং ২০১৪-১৫ গী মতম ফাওবদি পি ঐচ ই দিনা লোক অসীদগী ঈশীংগী পাইপ তিংলক্লগা খুলশিং অসীগী খুঞ্জাশিংগী চান্ন-থক্ননবা অমদি অতৈ হীরমশিংদা শীজিন্ননবা ঈশীং মরাঙ কায়না ফংলম্বনি।লোক অসীগী মচুমখক্তনা চীঙয়াদা লৈবা খুঙ্গংশিং অসীগী খুঞ্জাশিংগী লৌউ-শীঙুবা,থক্ন-চানবা অমদি অতৈ হীরমশিংদা শীজিন্ননবা ঈশীং চহী চূপ্পা,কুম্বী-কালেন খায়দনা ফংলম্বনি।অদূম ওইনমক, রেলৱে প্রোজেক্টকি টন্নেল হূৎপা হৌরকখিবদগী চীঙয়াদা লৈবা খুঙ্গংশিং অসীদা ইশীং য়াম্না ৱাৎনা ফংলি।

থক্ননবা ইশীং লিটর লীশীং অমদা লূপা ৭০০ য়ৌরে হায়না তাইরেনপোকপিদগী ৱাটর ইন-চার্জ ওইনা লৈরিবা নিংথৌজম মঙ্গিজাউ কৌবা অমনা ফোঙদোরকখি। টন্নেল প্রোজেক্ট অসিদা থবক শূরিবা শিন্মী ২০০/৩০০ অসীসু লোক অসীগী ইশীং শীজিন্নরকপনা খুঞ্জাশিং ঈশীং ফংলক্তবগী ফীভম হেন্না মায়োক্নরক্লি হায়না মহাক্না মখাতানা ফোঙদোকখি।