ওইল পম্প পূম্নমক থোঙ লোন্দুনা প্রোটেষ্ট তৌখ্রে

ওইল পম্পশিংদা পুবা-থাংবা ঙম্লোইদবা শেলগী দিমান্দ তৌদুনা বোম থমজীল্লম্বগী থৌওং য়ানিংদবা ফোঙদোক্তুনা থা অসীগী ১৩ দা মনিপুরদা লৈরিবা ওইল ফিল্লিং ষ্টেসন পূম্নমক থোঙ লোন্দুনা প্রোটেষ্ট তৌখ্রে। হৌখিবা দিসেম্বর ৬ তা ইম্ফাল ৱেষ্ট দিস্ট্রিক্টকি কৈকোলদা লৈবা ইবুধৌ পাখঙবা ওইল ফিল্লিং ষ্টেসনগী রেষ্ট রুমদা শকখঙদবা খূৎলায় পা‌য়বশিংনা পুবা-থাংবা ঙম্লোইদবা মওংদা অচৌবা শেলগী দিমান্দ তৌরকখিবগা লোয়ননা হেন্দ গ্ৰেনেদ অমা থমজিল্লমখিবা অমসুং মখোয়না দিমান্দ তৌরিবা অচৌবা শেনফম অদূ পীদ্রবদি অফবা ফল ফংলোই হায়দুনা অকি-অখঙ মায়োক্নহল্লম্বা থৌওং অদূবু য়াম্না কন্না য়ানীংদবা ফোঙদোক্লদুনা ওল মনিপুর পেট্রোলিয়ম দিলর্স ফ্রেটরনিটিশিংনা ওইল পম্পশিং থোঙ লোন্দুনা প্রোটেষ্ট তৌখ্রে।

পুবা-থাংবা ঙম্লোইদবা শেলগী দিমান্দ ওইল পম্পশিংদা তৌবিরক্কনু,পূন্না হিংমিন্নসি,বোম থমজিনবগী থৌওং য়ানীংদে হায়না থাবা বেন্নরশিং ওইল ফিল্লিং ষ্টেসনশিংগী মমাঙদা থেৎনখি।অদূম ওইনমক ওইল পম্পশিংগী মনাক্তদি ব্লেকতা পেট্রোল,দিজলনচিংবা মরাঙ কায়না ফংনখি। পেট্রোল লিটর অমদা লূপা ১৫০ দগী হৌরগা কা হেন্না মমল ৱাংনা য়োনবা থেংনখি। ইসেন্সিয়েল সার্বিসকি মনূঙ চল্লিবা ওইল পম্প শিংনা সি এস আরগী খূত্থাঙদা সিভিল সোসাইটি গ্ৰূপশিং অমসুং লোকেল বোদিশিংগা খূৎশম্নরগা কম্যুনিটি দেভলপমেন্টগী থবকশিংদসু অচৌবা মতেঙ পাংলিবনি।ফীল্ড আউটলেটশিং অসীনা ষ্টেটকি ইকোনোমিদসু অচৌবা মতেং পাংলিবনি হায়বা ৱাফমশিং ফোঙদোক্নখি।

লৈঙাক্না পেট্রোল লিটর অমদা লূপা ১৯.৫৬ ভেটকি শেনফম লৌরিবনি।দিজলগী ওইনা লিটর অমদা লূপা ১০.১১ লৌরি।পেট্রোল পম্পশিংদগী থা থাগী ওইনা পীরিবা ভেটকি শেনফম অসী চাউরাক্না লূপা ক্রোর ২৫দগী ৩০ ফাওবনি হায়না ফোঙদোকখি। অসীগুম্বা ইল্লিগেল ওইবা মওংদা পুবা-থাংবা ঙম্লোইদবা শেলগী দিমান্দ মখাতানা তৌরক্লবদি ওইল পম্পশিং মতম কক্তনা থিংজিনবগী খোঙজঙ ফাওবা চত্থরক্কনি হায়নসু ফোঙদোক্নখি।