লৈবাক অসীগী প্রসিদেন্ট না মনিপুরদা লৈরিঙৈদা আই দি পিশিংগী চপচাবা অমা খঙহনবিরম্মু: কোকোমি

লৈবাক অসীগী প্রসিদেন্ট দ্রৌপদি মুর্মুনা হৌজিক ইম্ফালদা লৈরিঙৈ মতমসিদা রিলিফ কেম্পশিংদা চঙজফম লৌদুনা লৈরিবা,নোংজু-নুংশা মরক্তা চহী অহূম অৱাবা খাঙদুনা লাকখ্রবা ইন্টর্নেল্লি দিসপ্লেস পার্সন (আই দি পি) লীশীং ৬০ হেনবা অসী করম্বা নুমিত্তা মপূঙফানা মশা-মশাগী মহৌশাগী লৈফমশিংদা তঙদূ-লৈতানা,অশোয়-অঙাম য়াওহন্দনা হঞ্জিলহনগদগে হায়বদু মনিপুরগী মীয়ামদা চপচানা খঙহনবিরম্মু হায়না কোকোমিগী কনভিনর খূরায়জম অথৌবনা ফোঙদোকখ্রে।

ইম্ফাল ৱেষ্ট দিস্ট্রিক্টকি লম্বোই খোংনাংখোংদা লৈরিবা আই দি পিশিংনা প্রোটেষ্ট তৌরিবা অদূদা শরুক য়ারদুনা অথৌবনা হায়, লৈবাক অসীগী ফার্স্ট ক্লাস সিতিজন ওইরিবা প্রেসিদেন্ট না মীয়ামগী ফংফম থোকপা ফন্দামেন্টেল অমদি কন্সটিট্যুসনগী মখাদা ফংফম থোকপা অতৈ রাইট পূম্নমক মপূঙ ফানা ফংলিব্রা হায়বদু য়েংশিনফম থোকপনি।মদূ ফংলমদবা তারবদি লৈবাক অসীগী লৈঙাক-সাসনগী মকোক ওইরিবা প্রসিদেন্টনা খূদক্তা মরী লৈনবশিংদা অকনবা ইন্সট্রক্সন পীদুনা মীয়ামগী ফংফম থোকপা রাইটশিং ফংহনগদবনি।

দিসেম্বর থা চঙলক্লে।থা অসীফাওবদা আই দি পিশিং মপূঙফানা হান্নগী মশা -মশাগী মফমশিংদা তেক্ত -কায়দনা হঞ্জিলহনবগী থবক লোইশিল্লগনি হায়বগী থাজবা পীখিবা লৈঙাক অসীনা হরাও-কূহ্মৈদা তাউদুনা লৈথোক্লি হায়না অথৌবনা অশাওবা ফোঙদোকখি।মীয়ামগী অৱাবা অসী কোক্ননবা চপচাবা ৱাফম ফোঙদোক্লমদ্রবদি ঐখোয়না মহাকপু প্রসিদেন্ট ওইনা লৌরকপগী ৱা লৈরক্লোই হায়না মহাক্না অকনবা ৱাফম ফোঙদোকখি। আই দি পিশিংগী অৱাবসি চপচানা খঙহন্ননবা মরী লৈনবা ব্যুরোক্রেট ওফিসারশিং রিলিফ কেম্পশিংদা কোকোমিনা চিংদুনা পুরবা মতূঙদা নিংথমথা মতমসিদা অহীঙ য়ারেকহনবগী মতাঙসু লাকপা য়াই হায়খি।কোকোমিগী থৌমীশিং,ৱিমেন ৱিংগী কাঙবূসু শজিৱা রিলিফ কেম্পদা অহীঙ অমা য়ারেক্তুনা,আই দি পিশিংনা করম্না অৱাবা খাঙলিবগে হায়বদু পূন্না খঙমীন্ননবা হোৎনগনি হায়না অথৌবনা ফোঙদোকখি।