টুটেল সটদাউন মনূঙদা প্রসিদেন্ট দ্রৌপদি মুর্মু ইম্ফালদা থুংলখ্রে,ক্রোর লীশিং হেনবগী প্রোজেক্ট লাউথোকখ্রে

লালহৌলূপশিংগী কোর্দিনেটিং কম্মিটি (কোর্কোম) না মহাক লাকপগী মায়োক্তা বোয়কোট তৌদুনা টুটেল সটদাউন লাউথোক্লিঙৈ চৈরক্তা ঙরাং নুমিৎয়ুংবা মতূঙদা ইম্ফালগী বির টিকেন্দ্রজিৎ ইন্টর্নেস্নেল এয়রপোর্টতা লৈবাক অসীগী প্রসিদেন্ট দ্রৌপদি মুর্মু থুংলখ্রে।মহাক্না এয়রপোর্ট অসীদা অখন্নবা এয়র ইন্দিয়া -ৱান এ‌রক্রাফ তোংদুনা লাকখি। এয়রপোর্টতা মনিপুর পুলিসকি নূপী টিমগী কন্টিঞ্জেন্টখক্তনা পীবা গার্দ ওফ ওনর অমা প্রসিদেন্টনা য়েংখি।মদূগী মমাঙদা মনিপুরগী গভর্নর অজয় কুমার ভাল্লানা লুচিংবা ওফিসিয়েলশিংনা প্রসিদেন্টবু এয়রপোর্ট তা হরাও-তরাম্না ওকখিবগা লোয়ননা বুকে অমা গভর্নরনা খূদোল তমখি।
সেক্যুরিটিগী অকনবা চেকশীন -থৌরাং লৌখত্তুনা গভর্নরবু তিদ্দিম লম্বীদা পুরকখি।টুটেল সটদাওন চত্থদুনা লৈরিবা মরম্না লম্বীদা মীয়াম চৎনদ্রবসু লম্বীগী মতাইদা লেপ্লম্বা মীওই খরদা প্রসিদেন্ট না খূৎ হাইরদুনা হরাও-তয়াম্বা ফোঙদোকখি।রাজ ভবন্দা লাক্লবা মতূঙদা মনিপুর লৈঙাক্না শীন্দুনা ইম্ফালগী পোলো গ্ৰাউন্দা পাঙথোকপা পোলো এগজিবিসন অমদা প্রসিদেন্ট না মীৎয়েং তাখি।মদুগী তুংদা মহাকপু তরাম্না ওকপগী থৌরম অমা সিটি কনভেন্সন সেন্তরদা পাঙথোকখি।মহাক্না মফমদুদা মীয়াম্বু থাগৎলদুনা ৱাফম কয়া থমখি।
ঙসী প্রসিদেন্টনা ইম্ফালদা লৈরিবা নূপীলাল কমপ্লেক্সতা গভর্নরগা লোয়ননা চত্তুনা ইহান-হানবা ওইনা লৈখিদ্রবা থৌনা ফরবী ঈমাশিং অদুগী মফমদা ঙক নোন্দুনা ঈকায়খুম্নবা ঊৎকনি। প্রসিদেন্টনা লমদম অসীগী কান্নরগদবা,লূপা ক্রোর লীশিং হেনবগী প্রোজেক্ট ময়াম লাউথোকখি।ঙসী মহাক্না সেনাপটিদসু চত্তুনা মীয়ামগী কনভেন্সন অমদা ৱা ঙাঙগনি।মদুগী মতূঙদা ইম্ফাল থাদোকখিগনি হায়রি।