প্রসিদেন্ট দ্রৌপদি মুর্মু ঙসী নুমিৎয়ুংবা মতূঙদা ইম্ফালদা থুংলরগনি,কোর্কোমগী বোয়কোৎ হৌখ্রে

নুমিৎ নীনীগী খোঙচত্তা লৈবাক অসীগী প্রেসিদেন্ট দ্রৌপদি মুর্মু ঙসী নুমিৎয়ুংবা মতূঙদা ইম্ফালদা থুংলরগনি।মহাক্কি মনিপুর খোঙচৎ অসীগীদমক ষ্টেট লৈঙাক্না সেক্যুরিটিগী অকনবা চেকশীন -থৌরাং কয়ামরুম মপূঙ ফানা লৌখৎলি।মফম কয়াদা সেক্যুরিটি ফোর্সনা ওপরেসন চত্থদুনা আইন্না য়াদবা খূৎলায় পায়বা অন্দরগ্ৰাউন্দ ওরগানাইজেসনশিংগী কাদরশিং ফাগৎপা,খূৎশু-খূৎলায় ক‌য়াসু ফাগৎপগী থৌওংশিং লেপ্তনা চঙশীল্লি।
চৈরকসিদা মহাক্কি মনিপুর খোঙচৎ অসীগী মায়োক্তা লালহৌলূপশিংগী কোর্দিনেটিং কম্মিটি (কোর্কোম) না ঙসী অহীঙ নোংয়াই মতুঙ পূঙ অমা তাবদগী প্রসিদেন্ট না ইম্ফাল থাদোক্ট্রিফাওবা মনিপুর পূম্বদা টুটেল সটদাওন অমা লাউথোক্তুনা প্রোটেষ্ট তৌবগী খোঙজঙ হৌখ্রে।
ঙসী প্রসিদেন্টনা নুমিৎয়ুংবা মতূঙদা ইম্ফালগী বির টিকেন্দ্রজিৎ ইন্টর্নেস্নেল এয়রপোর্টতগী রাজ ভবন ফাওবা লাক্কদৌরিবা,কিলোমিটর তরেৎ শাংবা তিদ্দিম লম্বী পরীংদা মচু কয়ানা লৈতেং ওইরবা ফীরালশিং থেৎপগা লোয়ননা কৈশাম্পাৎ জঙ্কসন মনাক্তা ফুট ২০ ৱাংলবা প্রসিদেন্ট মুর্মুগী শক্তম য়েকপা ৱেলকম বেন্নর অমসু শেম-শাদুনা থম্লি। প্রসিদেন্টনা, ইম্ফালগী মপাল কাঙজৈবূংদা হৌদোক্কদবা শগোল কাঙজৈ য়েংগনি হায়রি।
ষ্টেট লৈঙাক্কি মায়কৈদগী প্রসিদেন্টকি মনিপুর খোঙচৎ অসীগী মতাঙদা চপচাবা থৌরমশিংগা মরী লৈনবা ৱারোলশিং মীয়ামদা ফোঙদোরকপদি লৈত্রি।অদূম ওইনমক থাজবা য়াবা লীখূলগী মতূঙ ইন্না প্রসিদেন্ট দ্রৌপদি মুর্মুনা হয়েং দিসেম্বর ১২ দা ইম্ফালগী ঐতিহাসিক ওইরবা নূপীলাল কমপ্লেক্স তা মনিপুরগী গভর্নর অজয় কুমার ভাল্লাগা লোয়ননা, মতম অমদা মনিপুর কন্ননবগীদমক ব্রিটিসকী সিফায়শিংগা লান্থেংনখিবি থৌনা ফরবী ঈমাশিংগী ফোতোশিংদা হৈকৎ-লৈকৎ তমদুনা ঈকায়খুম্নবা ঊৎকনি হায়রি।ঙসী নুংদাংৱাইরম প্রেসিদেন্ট পু তরাম্না ওকপগী থৌরম অমা ইম্ফাল ইষ্ট দিষ্ট্রিক্টকি মনূঙচন্না লৈরিবা সিটি কনভেন্সন্দা পাঙথোক্কনি।
হয়েং সেনাপটি হেদ ক্বার্টরদা চৎলবা মতূঙদা প্রসিদেন্টনা ইম্ফাল থাদোকখিগনি হায়রি।