লমদম অসীগী আর্ট অমসুং কলচর য়োকখৎপদা মরূওইবা থৌদাং য়াদুনা থবক তৌরিবা আর্টিষ্ট,গুরু অমসুং অইবশিংদা, কুমশিং ১৯৭২ দা লিংখৎখিবা মনিপুর ষ্টেট কালা একাদেমিনা লীশাঙ শীৎনা এৱার্দ অমদি ফেল্লোসিপ কয়ামরূম পীদুনা লাক্লিবা অসীগী মখা তারকপা খোঙথাঙ ওইনা ঙরাং জৱাহরলাল নেহরু মনিপুর দান্স একাদেমিগী ওদিটোরিয়মদা মনিপুরগী গভর্নর অজয় কুমার ভাল্লানা শক্নায়রবা আর্টিষ্টশিং অমসুং নহা ওইরিবা অইবশিংদা এৱার্দ অমদি ফেল্লোসিপ কয়ামরূম পীদুনা ঈকায়খুম্নবা ঊৎখ্রে।
গভর্নরনা হীরমশিং অসীদা মনিপুরগী মিংচৎ পুরকখ্রবা আর্টিষ্ট অমসুং অইবা ৬৯ দা এৱার্দ পীদূনা ঈকায়খুম্নবা ঊৎখি। মনিপুর ষ্টেট কালা একাদেমি লাইফটাইম এচিবমেন্ট এৱার্দকা লোয়ননা দান্স, ম্যুজিক,শূমাঙ-লিলা,থাঙ-তা,ট্রাইবেল কলচর,লিটরেচরনচিংবদা থোইদোক হেন্দোকনা শক্নায়রবা আর্টিষ্টশিং অমসুং গুরুশিংদা শকখঙবা অমসুং ঈকায়খুম্নবা ঊৎপা ওইনা ফেল্লোশিপ অমদি এৱার্দ খূৎশীন্নখি।
নহা ওইরিবা অইবশিংদসু গভর্নরনা ফেল্লোশিপ খূৎশীন্নখি।এৱার্দ অমদি ফেল্লোসিপ কয়ামরূম পীখিবা অদূ কুমশীং ২০২৩-২৪ গী ওইননি।আর্ট অমসুং কলচর য়োকখৎপদা মরূওইবা থৌদাং য়াদুনা থবক তৌরিবা গুরু থোইদিংজম তোম্বিদা গভর্নরনা মনিপুর ষ্টেট কালা একাদেমি লাইফটাইম এচিবমেন্ট এৱার্দ খূৎশীন্নখি। রাস লিলা,লাই হরাওবা,ফোল্ক দান্স, ঈশৈগী হীরমশিংদা থোইদোক-হেন্দোকনা মশক থোকপা থৌদাং লৌবগীদমক এৱার্দ অমদি ফেল্লোসিপশিং অদূ লান্থোকপনি হায়বা ৱাফম থৌরমদুদা গভর্নরনা ফোঙদোকখি।