কুকি-জো কাঙলূপকি এম এল এশিংনা লৈঙাক শেম্বদা য়াওরবদি তুম্না হাৎকনি,মখোয়গী ঈমূঙ-মনূঙশিংসু তান্থোক্কনি: য়ু কে এন এ

মনিপুরদা পোপ্যুলর লৈঙাক অমা শেম্লকপা মতমদা কুকি -জো কাঙলূপকি এম এল এ শিংনা শরূক য়ারোইদবনি।সেপরেট এদমিনিষ্ট্রেসন ফংদ্রিফাওবা লৈঙাক শেম্বসু অমত্তা য়ারোই। করিগুম্বা কুকি -জো কাঙলূপকি এম এল এ শিংনা মনিপুর লৈঙাক শেম্বদা য়াওরকপা তারবদি মখোয় খূদিংমক্ তুম্না হাৎকনি অদূগা মখোয়গী ঈমূঙ-মনূঙশিংসু লোইনমক মনিপুরদা লৈহল্লোই,তান্থোক্কনি হায়না লৈঙাক্কা সস্পেন্সন ওফ ওপরেসন (সূ) সাইন তৌনবদা য়াওদবা য়ুনাইটেদ কুকি নেস্নেল আর্মী ( য়ু কে এন এ) না অকনবা ৱার্নীং পীরকখ্রে।
পার্টি অসীগী দিপার্টমেন্ট ওফ ইনফোর্মেসন্না ৱাফম অসী ফোঙদোক্লদুনা মখাতানা হায়,মতম কয়াগী মমাঙদগী কুকি -জো কাঙলূপকি মীয়াম্না দিমান্দ তৌরদুনা লাক্লিবা সেপরেট এদমিনিষ্ট্রেসন অসি অথূবা মতমদা মায় পাকহন্নবা কুকি -জো এম এল এশিংনা থবক পায়খৎকদবনি। মনিপুর লৈঙাক্কা মরী অমত্তা থম্লোইদবনি। কুকি -জো মীয়ামগী ইন্টরেষ্টতা শোকহনগদবা থবক- থৌরম অমত্তা চত্থরকপা য়ারোই হায়রক্লি।টেরোরিষ্ট কাঙলূপ অসী হন্দক আসাম রাইফলসনা চত্থখিবা ওপরেসন্দা মখোয়গী কাদর ৪ হাৎখ্রবনি। মদুগী তুংদা মখা তানা এ আরনা পাক-সন্না থিগৎলকপদগী কোয়চেন চেন্দুনা লোৎলগা লৈরিবনি।
নাকল অমরোমদা,লৈঙাক্কা সূ সাইন তৌনরিবা কে এন ও অমসুং য়ু পি এফকি ওইনদি লৈঙাক শেম্বদা কুকি -জো এম এল এশিংনা শরুক য়াবা নত্রগা য়াদবগী ৱাফম অসীদি মশা-মশানা ৱারেপ লৌজসনু হায়দুনা লৈখ্রবনি। কুকি -জো এম এল এশিং লৈঙাক শেম্বদা য়াওহন্নবা থবক পায়খৎলু হায়না সূ সাইন তৌনবদা য়াওরিবা লূপশিং অসিদা সেন্টরনসু তকশীনবা লৈরিবনি।