লূপ, পোলিটিকেল লিদর অমসুং পোলিটিকেল পার্টিশিংনা পাক-সন্না নিঙোল চাক্কৌবগী থৌরম পাঙথোক্নখ্রে

মনিপুরদা চহী খূদীঙগী হীয়াঙ্গৈ থাগী নীনী চনবা নুমিত্তা লেপ্তনা পাঙথোক্তুনা লাক্লিবা লমদম অসীগী খ্বায়দগী মরুওইবা, মৈতৈ ফূরুপকি নাৎ-কলচরগা য়াম্না নক্নবা কূম্মৈ অমা ওইরিবা নিঙোল চাক্কৌবগী থৌরম থা অসীগী ২৩ দা পাক- সন্না পাঙথোক্নখিবগা লোয়ননা তোঙান-তোঙানবা লোকেল এম এল এ, এম পি অমসুং পোলিটিকেল পার্টিশিংনা লমদম অসীগী মফম কয়াদা লৈরিবা আই দি পিশিং য়াওনা নিঙোল ওইবিশিংবু চাক্কৌবগী থৌরম পাঙথোক্নখ্রে।
চৈরকশিদা ওল মনিপুর ৱার্কিং জর্নেলিষ্ট য়ুনিয়ন ( অমজু) না শীন্দুনা নিঙোল ওইবি জর্নেলিষ্ট শিংবু চাক্কৌদুনা মাঙ্গোল আশির্বাদ পীখ্রে। ষ্টেট বি জে পিগী মায়কৈদগী খুমন লম্পাক য়ূথ হোষ্টেল রিলিফ কেম্প তা চঙজফম লৌদুনা লৈরিবা আই দি পি নিঙোলশিংবু থম্বাল শঙলেন্দা চাক্কৌখিবগা লোয়ননা ঙমজবা খূদোলপোৎশিং তমখ্রে।
থৌরমদুদা বি জে পি মনিপুরগী প্রসিদেন্ট এ সর্দা অমসুং মরুওইবা থৌমীশিং শরূক য়াখি।ইম্ফাল ৱেষ্ট দিষ্ট্রিক্টকি ককৱা লমদাইবুংদা অমেস্কো না শীন্দূনা মহৌশাগুম চীঙমী-তম্মি, ফূরুপ পূম্নমক্কি নীঙোলশিং চাক্কৌদুনা ঙমজবা খূদোল তমখি।হৌখিবা কুমশিং ১৯৯৩ গী নবেম্বর ১৫ দগী লূপ অসীনা লমদম অসীগী ফূরুপ খূদীঙমক্কি নীঙোলশিং চাক্কৌদুনা ঙমজবা খূদোল তমদুনা লাক্লি। নিঙোল ওইবি কয়ানা মবূং-মৌপ্বা ওইবশিংদা মাঙ্গোল- আশীর্বাদ পীখি।
থাংমৈবন্দ কেন্দ্রগী এম এল এ খুমুকচম জয়কিষন্না মহাক্কি কেন্দ্র দা লৈরিবা আই দি পি নিঙোলশিং অমদি চীঙমী- নীঙোলশিং চাক্কৌদুনা ঙমজবা খূদোল তমখি।লোক সভাগী এম পি দা. অঙোমচা বিমোল অকোয়জম্নসু মহাক্কি লোয়নবী ওলিভিয়া থৌনাউজমগা লোয়ননা মাঙ্গোলঙানবী কোল্লেজ রিলিফ কেম্প তা লৈরিবা আই দি পি শিং চাক্কৌদুনা ঙমজবা খূদোল তম্বগী থৌরম পাঙথোকখি।