ওল মনিপুর ৱার্কিং জর্নেলিষ্ট য়ুনিয়ন ( অমজু) লিংখৎখিবগী ৫১ রক শুবা মপোক কুম্মোন থৌরম ঙরাং ইম্ফালগী মেজোরখুলদা লৈবা মনিপুর প্রেস ক্লবতা চীং-লেম্না পাঙথোকখ্রে।থৌরম অদুদা লৈখিদ্রবা, ঈ-পাউগী লমদা থবক তৌরম্বা অমসুং হৌজিক হীরমসিদা থবক তৌরিবা পাউমীশিংদা ঈকায়খুম্নবা ঊৎখি। ভেটরান জর্নেলিষ্ট শিংদসু খূদোলপোৎ তমদুনা পূক্নীং থৌগৎখি।
থোংজু কেন্দ্রগী এম এল এ থোঙাম বিশ্বজিৎ, থাংমৈবন্দ কেন্দ্রগী এম এল এ খুমুকচম জয়কিষন, এদিটর্স গিল্ড মনিপুর ( ইজিএম) গী প্রসিদেন্ট খগেন্দ্র খোমদ্রাম, অমজুগী প্রসিদেন্ট আসেম ভক্ত অমদি পাওমীশিংনা থৌরমদুদা শরুক য়াখি।ঈ-পাউগী হীরমদা থবক তৌরিবা পাউমীশিংনা খুনাইদা শান্তি পুরক্ননবা, চাওখৎপা, ঈং- তপ্পা শক্তম লৈহন্ননবা হোৎনগদবনি। পাউমীশিংনা ইরিবা রিপোর্ট ময়াম অদুনা মীয়ামদা মতম মতমগী লৌশিংগী মঙাল পীরিবনি।
লৈঙাক অমসুং মীয়ামগী অপাম্বশিংদু খঙনা পাউ ফোঙবগী হৈনবী থমগদবনি হায়না থৌরমদুদা প্রেসিদিয়ম মেম্বর ওইনা শরুক য়াখিবা এম এল এ বিশ্বজিৎনা ফোঙদোকখি।কম্যুনিটিশিংগী মরক্তা নুঙাইনরোইদবা অমসুং লান্না খন্নখিবা য়াবা পাউদি ফোঙদনবা মতম লৈবা খিবিক্তা হোৎনসি হায়না বিশ্বজিৎনা ফোঙদোকখি।লাক্লিবা মথঙ চহীগী জানুয়ারি থাদা পাঙথোক্কদবা মনিপুর প্রেস ক্লবকি কুম্মোন থৌরম নংননবা ক্লব অসীগী লিফট হাপ্পগী থবক লোইশিন্ননবা থৌরাং তৌরি হায়না এম এল এ খুমুকচম জয়কিষন না থৌরমদুদা ফোঙদোকখি।