ওজাগী নুমিত্তা সনখ্যা ইবোতোম্বীবু ঈকায়খুম্নবা ঊত্তুনা মহাক্কি ফোতোদা মীয়াম্না লৈ- শু কৎনখ্রে

হন্দক চহীগী ওইনা ঙরাং সেপ্তেম্বর ৫ দসু লৈবাক অসীগী লৈখিদ্রবা শক্নায়রবা ওজা অমসুং হান্নগী য়ুনিয়ন ইদুকেসন মিনিষ্টর সর্বাপল্লি দা. রাধাক্রিষ্ণনবু নীঙশীংদুনা ওজাশিংগী নুমিৎ পাক সন্না পাঙথোক্নখ্রে। মনিপুর ষ্টেট শূমাঙ লিলা কাউন্সিলনসু ইম্ফালগী পেলেস কম্পাউন্দা লৈরিবা ইবোয়াইমা শূমাঙ লিলা শঙলেন্দা ওজাগী নুমিৎ মপূঙফানা পাঙথোকখি।
থৌরম অদূগা মরী লৈননা থীয়েটর অমসুং শূমাঙ কূমহৈগী মরমদা লমদমসিগী আর্টিষ্ট শিংবু তাকপী-তম্বিদুনা লমজীঙবিরম্বতা নত্তনা পুন্সিগী লোইরমদাই পূঙজা ফাওবদা মনিপুরগী থীয়েটর-লিলা চাওখৎহন্ননবা কত্থোকপগা লোয়ননা লেপ্পা লৈতনা হোৎনরম্লবা লৈখিদ্রবা ওজা সনখ্যা ইবোতোম্বী হাওরোকচম্বু নীঙশিংবা অমসুং ঈকায়খুম্নবা ঊত্তুনা আর্টিষ্টশিং অমসুং থীয়েটর-লিলাবু পামজবা মীওই কয়ানা ওজা অসীগী ফোতোদা লৈ-শূ কৎনখি।
থৌরম অদূদা শরূক য়াবা লাকখিবা মীয়াম্বু তরাম্না ওকপগী অমসুং থৌরমদুগী নুংগী ওইবা ৱারোল পীখিবা শুমাঙ লিলা কাউন্সিল মনিপুরগী লাইফটাইম সেক্রেটরি শৌগ্ৰাকপম হেমন্তনা ফোঙদোকখিবগী মতূঙ ইন্না, লমদমসিগী আর্টিষ্ট শিংবু তাকপী- তম্বিবগা লোয়ননা থীয়েটর-লিলা চাওখৎহন্ননবা হোৎনবদা সনখ্যা ইবোতোম্বী হাওরোকচমনা লৌখিবা থৌদাংশিং শীঙথাদুনা লোইবা নাইররোই। মহাক্তি মীয়াম অমসুং লমদমসিগী আর্টিষ্টশিংগী লেঙবা নাইদ্রবা গুরুনি। মহাক লৈখিদবা অসী ঈরমদম অসীগী থীয়েটর-লিলাগী অতিয়াদা তোমথিন ঙাল্লম্বা অরঙবা থৱান্মিচাক অমা মতম চূপ্পগী মূৎখ্রবনি হায়খি।
মনিপুর ষ্টেট কোওপরেটিব য়ুনিয়নগী প্রসিদেন্ট এল তোম্পিশক্না থৌরম অদূদা চিফ গেষ্ট, থীয়েটর সেন্তর মনিপুরগী প্রসিদেন্ট পি খোগেন্দ্রনা থৌরম মপূ অমসুং মনিপুর ষ্টেট শূমাঙ লিলা কাউন্সিলগী প্রসিদেন্ট এল তোম্বা অমদি রুপমহল থীয়েটরগী সেনিয়র দিরেক্তর লোইতোংবম ব্রজমোহোন্না অখন্নবা মীথূংশিং ওইনা শরুক য়াখি।