য়াম্না অঙকপা মওংদা পাকিষ্টান্না ন্যুক্লিয়র ৱারহেদ ১৭০ পৈশিন্দুনা থম্লম্বা থেংনরে:রিপোর্ট

মালেমগী লৈবাকশিংনা খন্নরম্বা ৱাখল্লোন অমসুং থাজনরম্বগী ৱাংমদা ইন্দিয়াগা য়াম্না কন্না য়েংথীনরিবা য়ূম্লোন্নবা লৈবাকসু ওইরিবা পাকিষ্টান্না ন্যুক্লিয়র ৱারহেদ ১৭০ পৈশিন্দুনা থম্লম্বা থেংনরে হায়না ইন্টেলিজেন্সকি রিপোর্ট অমনা খঙহল্লক্লি। মসীনা মরম ওইরগা য়ূমথঙনরিবা ইন্দিয়াগী ওইনদি য়াম্না নুংনাংনিঙায় ওইরক্লে হায়নসু রিপোর্ট অসীদা পল্লক্লি।

পাকিস্তান না অরোনবা ন্যুক্লিয়র ৱারহেদ অমসুং ন্যুক্লিয়র খূৎলায় কয়া শেমগৎ-শাগৎপগী প্রোগ্রাম কয়ামরুম হৌখিবা চহী খরা অসিদা য়াম্না থাজদবা মওংদা পায়খৎলম্বা হায়বসি ইন্দিয়াদা অচৌবা থ্রেট অমনি হায়না লৌফম থোকই হায়রি। থৌওং অসী লৈরবনা য়ূম্লোন্নবা লৈবাক অসীনা হেন্না মাঙহন-তাকহনবা ঙম্বা ন্যুক্লিয়র খূৎলায় কয়াসু মখাতানা পুথোরকপা য়ারি। ওইরক্লিবা ফীভম অসিদা মালেমগী কম্যুনিটিনা মীৎয়েং চঙফম থোক্লে হায়নরক্লি।

য়ুনাইটেদ ষ্টেটসকি দিফেন্স ইন্টেলিজেন্স এজেন্সিনা হৌখিবা কুমশিং ২০২০ গী মতমদা ফোঙদোকখিবগী মতূঙ ইন্না, পাকিস্তানদা কুমশিং ১৯৯৯ গী মতমদা ন্যুক্লিয়র ৱারহেদ ৬০ দগী ৮০ ফাওবদমক লৈরম্বা য়াই হায়খিবনি। মদূগী ওন্ন-তৈনবদা লৈবাক অসীনা লেপ্পা লৈতনা ন্যুক্লিয়র প্রোগ্রাম কয়ামরুম পায়খৎলম্বা অসী মিপাইনিঙায় ওইরি। য়ূমথঙনরিবা ইন্দিয়াখক্কি ৱাফম নত্তনা অসীগুম্বা পূকচেল লেপ্তবা অমদি পূক্নীঙ শেংদবা লৈবাক অমদা মীওইবা জাতিবু তুম্না মাঙহন- তাকহনবা ঙম্লবা অসূক য়াম্বা ন্যুক্লিয়র খূৎলায় পৈশিন্দুনা থম্লম্বা হায়বসি মালেমগী লৈবাকশিংনা য়াম্না লূম্না লৌফম থোকই হায়রক্লি।