সেন্টর লৈঙাক্না ই সি আইগা লৌতূনবগী থবক চত্থৈ হায়বা চার্জ তৌদুনা ওপ্পোজিসনগী এম পি শিংনা অকনবা ঈরাং হৌরকখ্রে

হৌজিক চত্থদুনা লাক্লিবা পারলিয়ামেন্ট হাওস অনীমক্কি নোংজু মীফম অসী হৌরকপদগী ঙসিফাওবদা ওপ্পোজিসনগী কংগ্রেসনা লুচিংবা ইন্দিয়া ব্লোক অমসুং অতৈ ওপ্পোজিসনগী এম পিশিংনা রুলিং বি জে পিগী তোঙান- তোঙানবা থবক-থৌরমশিংগী মতাঙদা য়ানিংদবা ঊত্তুনা চরাঙনবা কয়া থোকপদগী সেসন অসীগী প্রোসিদিং অমত্তা মপূঙফানা চত্থবা ঙমহন্দ্রি।
ঙরাংসু পারলিয়ামেন্ট হাওস অনীমক্তা মেম্বরশিংনা সেন্টরগী বি জে পিনা লুচিংবা লৈঙাক অমসুং ইলেক্সন কম্মিসন ওফ ইন্দিয়া (ই সি আই) অনীনা লৌতূনবগী থৌওং কয়া চত্থদুনা লৈবাক অসীগী ইলেক্তোরেল সিষ্টেম পূম্নমক কাং-খোং চাইহন্ননবা থৌশিল পায়খৎলক্লে হায়বা মরালশিং শীরদুনা হাওস অনীমক্তা অকনবা খোল্লাউ কয়াগা লোয়ননা খোঙজঙ চঙশীল্লকখিবদগী হাওস কি মীফম নোংমগী ওইনা এদজোর্ন তৌখ্রে।
খোঙজঙ চঙশীনবদা মাঙজীল থানা শরুক য়াখিবা কংগ্রেস পার্টিগী লুচিংবা রাহুল গান্ধী, প্রিয়াঙ্কা গান্ধী ভাদ্রা, শিব সেনা (য়ু বি টি) গী লিদর সঞ্জয় রাৱটনচিংবা য়াওনা মরূওইবা ওপ্পোজিসনগী লিদর কয়ামরুম দিল্লি পুলিসনা ফাজীনখি। দিল্লি পুলিসকি জোইন্ট কম্মিস্নার দিপক পুরোহিৎনা এম পি খরা ফাজীল্লে হায়বা ৱাফম পাউমীশিংদা ফোঙদোকখি। অদূম ওইনমক চপচানা এম পি মশীঙ কয়া ফাজীল্লবগে হায়বা ৱাফম দি ফোঙদোরকখিদে হায়রি।
পুলিসনা ওপ্পোজিসনগী খোঙচৎ অমসু মায় পাকহনখিদে। ইন্দিয়া ব্লোক না লুচিংদুনা পারলিয়ামেন্ট হাওসতগী ই সি আই ওফিসফাওবা পেন্দবগী খোঙচৎ অমা চৎননবা শেম শারি হায়বদু দিল্লি পুলিসনা মাঙজৌননা খঙবা ঙমখিবগা লোয়ননা লম্বীশিং থিংজিন্দুনা চৎহন্দনবা অকনবা চেকশীল থৌরাং লৌখৎখি।