কেম্পেন ফোর জষ্ট এন্দ ফ্যের দিলিমিটেসন (জে এফ দি)না মমাঙদা লাউথোকখিবগী মতূঙ ইন্না, সেন্টর অমসুং ষ্টেট লৈঙাক্কি মখাদা লৈরিবা ওসিসশিং থিংজিনবগী খোঙজঙ ঙরাং সেপ্তেম্বর ১১ দগী হৌখ্রে।
এন আর সি অপদেট তৌরবা মতূঙদা মনিপুরদা সেন্সস কোন্না চত্থগনি অমসুং কুমশিং ১৯৫১ দা বেজ ইয়ার ওইরগা এন আর সিগী থবক পায়খৎকনি হায়বগী চপচাবা ওফিসিয়েল ওর্দর অমা সেন্টরগী মরী লৈনবা অথোরিটিনা থোকহন্নবা মনিপুরগী এম এল এ অমসুং মিনিষ্টরশিংনা চৎলিবা সেপ্তেম্বর থা অসীগী ১০ ফাওবগী মনূঙদা দিল্লিদা চত্তুনা সেন্টরগী লুচিংবশিংদা তকশীল্লুগদবনি, মদূ পাঙথোকপা ঙমদ্রবদি সেপ্তেম্বর ১১ দগী মনিপুরদা লৈরিবা সেন্টর অমসুং ষ্টেটকি ওফিস খূদীঙমক থিংজিনবগী খোঙজঙ চত্থরগনি হায়না জে এফ দিনা লাউথোকখিবা লৈখ্রবনি।
মনিপুর লৈঙাক্কি মায়কৈদগী দিমান্দ অদূ থবক ওইনা পাঙথোক্তে হায়বগী পেন্দবা ফোঙদোকপগা লোয়ননা ঙরাংদগী লূপ অসীনা মীয়ামগা লোয়ননা খোঙজঙ চঙশীনবা হৌখিবনি। খোঙজঙগী অহৌবা নুমিৎতা ইম্ফাল ইষ্ট দিষ্ট্রিক্টকি পোরোম্পাত্তা লৈরিবা এস দি ও, এস দি সি ওফিসশিং য়াওনা তোঙান তোঙানবা ওফিসশিংদা লৈরম্বা ষ্টাফ পূম্নমক মপান্দা হোইদোক্লবা মতূঙদা ওফিস খূদীঙমক ছো লোন্সীনখি। ইম্ফাল ইষ্ট ডিষ্ট্রিক্ট পুলিসকি টিম অমা লাক্তুনা জে এফ দিগী থৌমী অহূম ফাজীনখ্রে। লোন্সীল্লম্বা ছো পূম্নমক পুলিস লাক্তুনা থুগাইখি। মোইরাং মায়কৈদসু মীয়াম্না ওফিস থিংবগী থবক পাক-সন্না চত্থখি হায়রি।
নাকল অমরোমদা, জে এফ দিগী খোঙজঙসু হেন্না কন্সীল্লগনি হায়বা ৱাফমশিং ফোঙদোরক্লি। ঙরাং নুংথিল পূং ১ রোম তাবদা হোম মিনিষ্টর গোবিন্দাস কোন্থৌজমগা উনদুনা ৱারী শান্নখ্রবসু ৱারোয়শিন অমত্তা পুরকপা ঙমখিদে।
