পি আর শাংদোকপনা সোল্যুসন অমত্তা মনিপুরদা পুরক্লোই, মীখল পাঙথোক্তুনা মীয়ামগী মেন্দেট লৌগদবনি: বিমোল

মনিপুরদা হৌখিবা ফেব্রুয়ারি ১৩ দগী হৌজিক ফাওবা প্রসিদেন্ট রুল থমজিন্দুনা মীয়াম ৱাহন্দুনা থম্বসি নত্তনা কান্নবা অমত্তা পুরকপা ঙমদ্রি। চৈরকশিদা হৌজিক মখাতানা ষ্টেট অসীদা থা তরুক পি আর শাংদোক্ননবা সেন্টরনা থৌরাং তৌরক্লিবসি য়াবা ঙম্লোই। থৌওং অসিনা হৌজিক মনিপুরদা থোক্লিবা হ্যুমেনিটারিয়ান ক্রাইসিস অসী লাকশীনবা ঙম্লোই, মদুগী মহূত্তা নৌনা মীখল পাঙথোক্তুনা মীয়ামগী মেন্দেট লৌরগা লৈঙাক অমা শেমহল্লবদি হীঙশাগী ঈরাং অসী শোয়দনা লাকশীনবা ঙম্লক্কনি,ঈঙ-তপ্পা মহৌশাগী শক্তমদু হঞ্জিলহনবা ঙম্লক্কনি হায়না মনিপুর ইন্নর পারলিয়ামেন্টরি কন্সটিট্যুয়েন্সিগী লোক সভা এম পি ওইরিবা দা. অঙোমচা বিমোল অকোয়জম্না লোক সভা হাওসতা ফোঙদোকখ্রে।

ঙরাং য়ুনিয়ন মিনিষ্টর ওফ ষ্টেট ফোর হোম এফ্যের্স নিত্যাইনন্দ রাইনা মনিপুরদা মখাতানা থা তরুক পি আর শাংদোকহন্নবগী ৱাফম হাওসনা খন্ননবা হৌদোরকপদা হাওসকি মেম্বরশিংগী মরক্তা কা হেন্না চরাঙনবা অমসুং অশাওবা ৱাফম কয়ামরুম ফোঙদোক্নরক্তুনা রুলিং বি জে পিগী মথক্তা অকনবা য়ানিংদবগী ঈরাং হৌরকখি। স্পিকরনা মেম্বরশিং অদূবু লাকশীনবা ঙম্লক্তবদগী নুমিদাংৱাইরম পূঙ ৫.৩০ ফাওবা হাওসকি মীফমদু য়ৈথোকখি। মীফম অদুদা শরুক য়াখিবা দা. এ বিমোলনা ৱাফম অসী ফোঙদোকখিবনি।

প্রাইম মিনিষ্টর অমসুং সেন্টর লৈঙাকপু মহাক্না য়াম্না অকনবা মওংদা চৈরদুনা, হন্দক্তা লৈখিদ্রবা, মালেমগী মীয়াম্না শকখঙনরবা লিজেন্দরি থীয়েটর পার্সনেলিটি রতন থীয়ামগীদমক অৱাবা ফোঙদোকপগী ৱাহৈ অমফাওবা পি এম মোদিগী চীন্দগী ফোঙদোরক্তবসি য়াম্না লাইবক থীবনি। অতৈ ইন্দিয়াগী আর্টিষ্ট শিং লৈখিদবা মতমদদি পি এম্না কন্দোলেন্স মেসেজ কয়া পীখি হায়না পেন্দবা কয়া বিমোলনা থমখি। জম্মু কাস্মির ইস্যুদদি সেন্টর অমসুং প্রাইম মিনিষ্টরনা নেস্নেল এট্টেন্সন পীদুনা ৱা ঙাঙলি অদুগা চহী অনী হেন্না হ্যুমেনিটারিয়ান ক্রাইসিস মায়োক্নরক্লবা মনিপুরগী মতাংদনা ৱাফম অমত্তা হৌজিকফাওবা ফোঙদোক্তনা লৈরি হায়না দা. বিমোলনা অশাওবা ফোঙদোকখি।