লমদমসিদগী আফস্পা মপূঙফানা লৌথোকখিননবা হোৎনবদা লায়রবা -ঈনাকখুনবা খায়দনা পূন্না থৌদাং লৌমীন্নবগী তঙায়ফদবা চঙই: ফুলিন্দ্রো কোন্সম

য়ারক থোক্না শাংদোকহন্দুনা থম্লক্লিবা দ্রাকোনিয়ন লো অমা ওইরিবা আর্ম ফোর্সেস স্পেসিয়েল পাৱার্স এক্ট, ১৯৫৮ হায়রিবা, কোলোনিয়েল ব্রিটিস লৈঙাক্না ইন্দিয়াবু খূদুম চন্দুনা লৈরিঙৈ মতমদা চল্লাইরম্বা এক্ট অসী লমদমসিদগী মরূ ফূক্তোক্লগা লংথোকখ্রসি হায়রবদি লায়রবা-ঈনাকখুনবা, জাতি-কাঙলূপ খায়দনা য়েলহৌঙৈদগী খুন্দামিন্নদুনা ঈরমদম অসীদা হিংমিন্নরক্লবা কাঙলূপ খূদিংমক্না চপ মান্নরবা পূকচেল-ৱাখলগা লোয়ননা অকনবা খোঙজঙ চঙশীনমিন্নবগী তঙায়ফদবা লৈ হায়না ৱার্কিং কম্মিটি ওন অপূনবা মনিপুরগী কোর্দিনেটর ফুলিন্দ্রো কোন্সম্না ফোঙদোকখ্রে।

থাংজম মনোরামা মেমোরিয়েল চেরিটেবল ট্রষ্ট, বামোন কম্পু অমসুং অপূনবা লূপ মনিপুরনা শীন্দুনা বামোন কম্পু কম্যুনিটি হোলদা পাঙথোকপা মানোরামা লৈখিদবা, য়াম্না লাইবক থীবা থৌদোক অদূগী চহী ২১ শুরকপা নীংশীং কুম্মোন থৌরমদা ফুলিন্দ্রোনা ৱাফম অসী ফোঙদোকখিবনি।

লমদমসিগী মিনিষ্টর, এম এল এ শিংনসু আফস্পা অসী মখোয়-মখোয়গী মতমদা থোকখিবনি, ঐখোয়গী মতমদা নত্তে হায়না অমনা অমদা মরাল পীশীন্নদুনা লৈবগী মতমদু নত্তে, পূন্না খূৎশম্নরগা তমথিরবা দ্রাকোন্নিয়ন লো অসী মরূ ফূক্তুনা লংশেকখিনবা ৱাশক অদূ লৌমিন্নরসি হায়খি। ব্রিটিশনা ইন্দিয়ানশিংগী মচীন মেন্ননবা, পাঙ্গল-শক্তি, অধিকার পূম্নমক মাঙহন্ননবা অমদি হাৎনিংবা, কাপ্নিংবা মতমদা হাৎপা, কাপ্পা য়ানবা শেম্লম্বা আর্ম ফোর্সেস স্পেসিয়েল পাৱার্স ওর্দিনান্স ১৯৪২  অদূ ইন্দিয়ান পারলিয়ামেন্ট না ১৯৫৮ দা পাস তৌদুনা মনিপুরগুম্বা লমদম খরদা চল্লাইরিবসি শূপ্নম শাশন্নি, কৈদৌনুংদা য়াবা ঙম্লোই হায়খি।