ইনীঙথৌ মালিয়াফম পালচাগী অহানবা ওবজার্বেসন দে থৌরম পাঙথোকখ্রে

মৈতৈ ফূরূপ্না থাপালোন চৎনবা হৌখিবা কুমশিং ৩৪২৩ মপূঙ ফারকপগা লোয়ননা থাপালোন চৎনবা হৌদোকখিবা ইনীংথৌ মালিয়াফম পালচাগী অহানবা ওবজার্বেসন দে থৌরম পাঙথোকখ্রে।
কংলৈপাক কেলেন্দর বোর্দনা শীন্দুনা ইম্ফালগী মনিপুর প্রেস ক্লবতা পাঙথোকখিবা ওবজর্বেসন দে থৌরম অদুদা মনিপুর লৈঙাক্কি দিপার্টমেন্ট ওফ ইনফোর্মেসন এন্দ পব্লিক রিলেসন্সকি দিরেক্তর ঙাঙোম উত্তম্না অথোয়বা মীথূঙলেন ওইনা শরুক য়ারদুনা ৱা ঙাঙখি। মদূগী মমাঙদা ইনীংথৌ মালিয়াফম পালচাগী ফোটোদা মীয়াম্না হৈ- লৈ কত্তুনা ঈকায়খুম্নবা ঊৎখি।
ইন্দিয়াগী অমসুং মালেমগী ওইনা য়েংবদা মশাগী লোল অমসুং ময়েক লৈজবা, মশাগী তোপ-তোপ্পা নাৎ অমসুং কলচর ময়েক শেংনা লৈজবা ফূরূপশিংগী মশীঙ অসী ইয়াম য়ামদে। ইন্দিয়াগী অৱাং-নোংপোক লমদমদা লৈরিবা ফূরূপশিংগী মনূঙদা মশাগী তোমথিন ওইনা ময়েক অমসুং লোল লৈজরিবা ফূরূপ অমখক হায়বা তারবদি মীটৈ হায়রিবা ঐখোয়গী ফূরুপ অসীখক্তনি হায়খি।
আসাম হায়রিবা চাউখ্রবা ষ্টেট অসীফাওবা মশাগী লোল লৈজরবসু ময়েক্তি লৈজদে। লোল অমসুং ময়েক লৈজরিবা ইন্দিয়াগী ফূরূপ অয়াম্বদি অমদগী অতোপ্পা ফূরুপ অমনা পূথোক-পূশীন তৌনরগা শেম্বা ঙাক্তনি। মীটৈ খুনাইগী ওইনা যিশু খ্রিষ্ট না পোক্ট্রিঙৈ মমাঙ চহী ১৩২৮ গী মতমদগী থাপালোন চৎনবা হৌরম্বা হায়বসি ঐখোয়গী ওইনদি য়াম্না চাউথোকচনিঙায়নি হায়না উত্তম্না ফোঙদোকখি।
মালেমগী ওইনা লোল ৬০০০ লোম লৈজরবসু মশাগী তোপ- তোপ্পা ময়েক লৈজবা ফূরূপ্তি মশীঙ য়ামদে। ফিজিকেল এনাটোমিদা য়ূম্ফম ওইবা ময়েক্তি মালেমগী ওইনা মীটৈ ময়েকখক্তনি। ঐখোয় মশেল মরক্তা অনী থোকপীগী চৎনবী অমা লৈরিবসি লৌথোক্তুনা অমত্তা ওইনা থবক তৌমিন্নরবদি চাওখৎপা খুন্নাই অমা পুরকপা ঙমগনি হায়না মহাক্না মখা তাখি।