কাঙলূপ ফূরূপ কয়াগী মশীঙ য়াম্লবা মীয়াম্না শরূক য়ারদুনা দি গ্রেট জূন অপরাইজিং, য়ুনিটি ডে থৌরম মপূঙফানা পাঙথোকখ্রে

ইন্দিয়া লৈঙাক অমসুং এন এস সি এন ( আই এম)  অনীগী মরক্তা সাইন তৌনখিবা, বেঙ্কোক দিক্লারেসন হায়রগা খঙনখিবা সিজফায়র এগ্ৰিমেন্ট কি মতাঙ অমদা “সিজফায়র ৱিদাউট টেরিটোরিয়েল লিমিট”, হায়বা ৱাফম অমা য়াওরকখিবা অদূগী মায়োক্তা মীয়াম্না মনিপুরগী অপূনবা শক্তম কায়বা য়ারোই হায়না অদূঙৈ কুমশিং ২০০১ গী জূন ১৮ দা হৌনরুবা নাইদনা চঙশীল্লকখিবা ঈহৌদা ঈমা লৈবাক্কিদমক থৌনা ফনা থৱায়না পোন্থা পীখ্রবা লমদম অসীগী অথৌবা মপারী-মমোম ১৮ গী মফমদা ঈকায়খুম্নবা ঊত্তুনা ইম্ফালদা লৈরিবা কেক্রুপাত্তা লমদম অসীগী কাঙলূপ-ফূরুপ কয়াগী মশীঙ য়াম্লবা মীয়াম্না হৈকৎ-লৈকৎ তমখ্রে। কুমশিং ২০০১ গী জূন ১৪ দা ইন্দিয়া লৈঙাক অমসুং এন এস সি এন অনীগী মরক্তা সিজফায়র এগ্ৰিমেন্ট অদূ খূৎয়েক পীনখিবনি।

মনিপুর মীয়ামগী অকনবা ঈহৌ লাকপদগী ৱিদাওট টেরিটোরিয়েল লিমিট হায়বা ফ্রেজ অদূ কোন্নথংদা হন্দোকখিবনি। দি গ্রেট জূন আপরাইজিং, য়ুনিটি ডে থৌরম অদূ ঙরাং অঙনবা অয়ূক পূঙ ৫ তাবদগী য়াকায়রোল শক্তুনা হৌদোকখি। মদূগী মতূঙদা লাইশোন-তীন্সোলগী থৌরম পাঙথোকখি। মখা তারকপদা, ওবজার্বেসন কম্মিটিগী চ্যেরমেনসু ওইরিবা অমুকোগী প্রসিদেন্ট নন্দো লূৱাং অমসুং কম্মিটিগী ভাইস প্রসিদেন্ট ওইনা লৈরিবা য়ুসিএমগী প্রসিদেন্ট ৱাই কে ধিরেন অনিনা লুচিংদুনা অথৌবা ১৮ গী মফমদা মীয়াম্না হৈকৎ-লৈকৎ তমখি।

অথৌবা ১৮ গী খুভম লৈরিবা কেক্রুপাৎনা লৈরিবমখৈ, অমুকো অমসুং য়ু সি এমনা মনিপুরগী মীয়ামগা পূন্না, অমত্তা ওইনা লৈরিবমখৈ, ঈরমদম মনিপুরগী শক্তম কনাগুম্বা শক্তি অমত্তনা কায়হনবা ঙম্লোই, শীঙনরকপা তারবদি থৱায়না পোন্থা ওইদুনা থেংনগনি হায়না নন্দো লূৱাংনা ফোঙদোকখি।