থীনূঙ্গৈদা লৌমীশিংনা মশাগী লৌ উননবা ট্রেক্টর শীজিন্নরগা লৌ খোইরিঙৈদা পার্মিসন ফংদ্রি হায়দুনা সেন্ট্রেল ফোর্সনা অথীংবা পীরকখ্রে

মনিপুরদা চহী অনী হেন্না চত্থরক্লিবা হীঙশাগী ঈরাঙ অসীদা চীঙগা তাইননা লৈরিবা তম্পাক্কি এরিয়াশিংদা কুকি-জো কাঙলূপকি মিলিটেন্টশিংনা ঙাইহাক লৈতনা নোংমৈ কাপশীন্দুনা লান্দারকপদগী লৌ শুদুনা লৈবা লৌমী নূপা নূপী কয়া শিখিবা মরম্না মতম শাংনা লৌ পানবা ঙম্নদনা লাক্লি।

চৈরকশিদা ঈরাঙ কল্লবসু হিংদবা য়ারক্তবনিনা চীঞ্জাক্কি মথৌ তারকপনা শিরবসু চঙলবসু লৌ পালহৌদবা য়াদে হায়বা পান্দমদা বিষ্ণুপুর দিষ্ট্রিক্ট কি থীনূঙ্গৈদা লৈরিবা লৌমীশিংনা মফম অদূগী হায় কেনেল মথক, কেনেলগী অকোয়বদা লৈরিবা মফমশিং অমসুং লো কেনেলগী মনাক্তা ট্রেক্টর শীজিন্নরগা লৌ শুদুনা লৈরিঙৈদা ঙরাং মফম অদূদা লৈরম্বা সেন্ট্রেল ফোর্সশিংনা চঙশীল্লক্লগা লৌ শূবগী থবক লেপ্ননবা খঙহল্লকখিবগা লোয়ননা লৌ উবা য়াননবগী পার্মিসন য়াওদে, লৌ শুবা য়াখিরোই হায়দুনা অথীংবা পীরকপদগী লৌমীশিংগা য়াম্না কন্না মূক্নখ্রে।

সেন্ট্রেল ফোর্সনা অথীংবা পীরক্লবসু লৌমীশিং অদূ মশা মশাগী য়ূমদা হন্নরকপগী মহুত্তা লৌবূক্তা ফমজীন্দুনা প্রোটেষ্ট তৌদুনা লৈখি। লৌমীশিং অদূনা মশা-মশাগী লৌফমশিংদা লৌ শূবা য়াননবা থৌরাং পায়খৎপিয়ু হায়দুনা চহী অসীগী মার্চ ১৯ দগী ঙসীফাওবা মরী লৈনবা দি সি, এস পি, বি এস এফ, এস এস বি নচিংবগী অথোরিটিশিংগা কয়ারক হন্না মীফম পাঙথোক্তুনা লাকখ্রবনি হায়রি। মসীফাওবদা অথোরিটিশিং অসীনা থৌশাদনা লৈথোকখিবদগী চাবা ফংদবগী, লায়রবগী চৈথেঙ মায়োক্নবা হেঞ্জিল্লক্লবা লৌমীশিং অদূনা মশাগী রিস্ক লৌজরগা, হিংলবসু-শিরবসু মরন্নাই ওইজরসনু হায়বা ৱাখল্লোন্না মাঙদা থম্লগা মশা- মশাগী লৌ খোইবা হৌরকখিবনি হায়রি।