মনিপুরদা ঙাগী পোত্থোক অসী মীয়ামগী দরকার লৈরিবা চাংদগী কা হেন্না হন্থবগা লোয়ননা অৱাৎপা ময়াম অদু ইন্দিয়াগী অতোপ্পা ষ্টেটশিংদগী পুশিল্লকপা ঙাক্তনি। মতৌ অসূম্না মনিপুরনা মপান্দগী ঙা লৈবদা চহী অমদা লূপা ক্রোর ৪০০ রোম চাদিং তৌদুনা লাকখিবনি। অদূম ওইনমক ঙসীদি ষ্টেট লৈঙাক্কি ফিসরিজ দিপার্টমেন্ট অমসুং প্রোগ্ৰেসিব ফিস ফার্মরশিংনা কন্না হোৎনবদগী ঙাগী পোত্থোক অসী শীঙথানিঙায় ওইনা হেঙ্গৎহনবা ঙম্লক্লে। হৌখিবা চহী অমা অনীগী মতমদগীদি মনিপুরনা মপান্দগী ঙা লৈবদা লূপা ক্রোর ২০০ রোমদমক চহী অমদা চাদিং তৌরে, হান্নদগী তঙ্খাই অমা হন্থরে হায়না ষ্টেট লৈঙাক্কি ফিসরিজ মিনিষ্টর হৈখাম দিঙ্গোনা ফোঙদোকখ্রে।
মনিপুর লৈঙাক্কি ফিসরিজ দিপার্টমেন্ট অমসুং এদিটর্স গিল্ড মনিপুর অনীনা খূৎশম্নরগা থা অসীগী ৮ দা ইম্ফালদা লৈবা দিরেক্তরেট ওফ ইনফোর্মেসন এন্দ পব্লিক রিলেসন্স( দি আই পি আর) গী ওদিটোরিয়মদা পাঙথোকখিবা ফিসরিজ ওফ রিচ প্রোগ্রাম দা অথোয়বা মীথূঙলেন ওইনা শরুক য়াখিবা ফিসরিজ মিনিষ্টর হৈখাম দিঙ্গোনা ৱাফম অসী ফোঙদোকখিবনি।
হান্না ঙা লৈবদা চহী অমদা লূপা ক্রোর ৪০০ রোম মনিপুরদগী মপান লমদা চৎখিবদু, পীকচরবসু দিপার্টমেন্ট অসীনা অকনবা থবক পায়খৎপদগী ঙসীদি সূপ্নগী ক্রোর ২০০ রোমদমক চাদিং তৌরে। মসিসু অমুক চৎহনখিদনবা ফিসরিজ দিপার্টমেন্ট অসীনা অঙম্বা থাক্তা হোৎনখিগনি হায়না মিনিষ্টর না ফোঙদোকখি।