সিট ৭০ লৈরিবা দিল্লি এসেমব্লি মীখলগী ভোৎ মশীং থীবা থা অসীগী ৮ দা মপূঙফানা লোইখিবগা লোয়ননা ভার্তিয়া জনটা পার্টি (বি জে পি) না সিট ৪৮ দা চাউনা মায় পাকখ্রে। বি জে পিগী ওইনদি চহী ২৭ কি মতূংদা হন্দক্কি অসিনা লৈঙাক পায়বা অহানবা ওইরগনি। কুমশিং ২০১৫ গী মীখলদা আম আদমি পার্টি (এএপি) না সিট ৬৭ ফংদুনা চাউনা মায় পাকখি। মদূগী মতূংদা অমুকসু কুমশিং ২০২০ গী এসেমব্লি মীখলদা পার্টি অসীনা সিট ৬২ ফংদুনা লৈঙাক শেমখিবনি। হন্দক্কি মীখল অসিদদি এএপি না সুপ্নগী সিট ২২ দা মায় পাকখি। পার্টি অসীগী লুচিংবা আর্বিন্দ কেজ্রিৱাল গা লম্বা তৌনখিবি বি জে পিগী মীরেপ পরভেস ভর্মানা দিল্লিগী খ্বায়দগী মরূ ওইখ্রবা এসেমব্লি সিট অদুদা কেজ্রিৱালবু ঈরায় লায়না মায়থীবা পীরমখি।
এএপিগী মকোকথোংবা লুচিংবা অমা ওইরিবা মানিশ শিশোদিয়াসু জংপুরা কেন্দ্রদা চাউনা মায়থীবা নংখ্রে। বি জে পিনা হৌজিক দিল্লিদা লৈঙাক শেম্ননবা থৌরাং লোইখ্রে। পার্টি অসীগী ওইনদি হন্দক্কি অসী য়াম্না চাউরবা মায় পাকপা অমা ওইখ্রে। আর্বিন্দ কেজ্রিৱালগী লৈঙাক অমখক্তি য়ূমথঙনরিবা পঞ্জাবতা লৈরি। ষ্টেট অসিদা মহাক্না চিফ মিনিষ্টর ওইরকপা য়াই হায়রি। কুমশিং ২০২২ দা পাঙথোকখিবা পঞ্জাব এসেমব্লি মীখলদা আম আদমি পার্টি না অপূনবা সিট ১১৭ লৈবগী মনূংদা সিট ৯২ ফংদুনা য়াম্না চাউনা মায় পাকখিবনি।
পঞ্জাবকি লুধিয়ানা এসেমব্লি সিট হৌজিক হাঙদুনা লৈরি। কেন্দ্র অদুগী এম এল এ লৈখিদবদগী মীখল পাঙথোক্ননবা ঙাইদুনা লৈরিবনি। সিট অদূগী মরক্কি মীখলদা আর্বিন্দ কেজ্রিৱাল মীরেপ ওইননবা থৌরাং তৌখ্রে।অদূম ওইনমক ফীভম অসি য়ৌরকপদা এএপি মরক্তা উংখৎনবা খরসু লাক্লি। মরম অদুনা দিল্লিগী এসেমব্লি মীখলদা মায়থীহৌরবা কেজ্রিৱালবু পঞ্জাবকি চিফ মিনিষ্টর ওইহনবা হায়বসি ওইথোক্কদ্রা নত্রগা ওইথোক্লোইদবা অমরা হায়বসি অচৌবা ৱাহং অমদি ওইরি হায়রি।