খুল ঙাকপা নহারোল ফাবা, হাৎপা য়ানীংদে হায়বগী খোঙজং মফম কয়াদা পাক সন্না চত্থরি

পুলিস কম্মান্দোশিংনা খুল ঙাকপা ঈচাশিং ফাবা-পুনবা অমসুং মথৌনা ঊত্থোক্তুনা হাৎপফাওবা য়াওরক্লিবসি লমদম অসিদা লৈরিবা মমা ওইবিশিংনা কৈদৌনুংদা য়াবা ঙম্লোই হায়না মৈরা পায়বী ঈমাশিংনা মনিপুরগী তোঙান তোঙানবা মফমশিংদা অকনবা খোল্লাউগা লোয়ননা খোঙজঙশিং চঙশীল্লক্লি। খোঙজঙ কয়া অসীগী শরুক অমা ওইনা থা অসীগী ২৪ দসু ইম্ফাল নোংচূপ পানাগী মনূংচন্না লৈরিবা লংথবাল মন্ট্রিখোং অৱাং লৈকায় অপূনবা মৈরা পায়বী লূপ, য়ং ফ্যুচর ওরগনাইজেসন অমসুং ইন্দিজিনস পিপলস এসোসিয়েসন ওফ কংলৈপাক ( ঈপাক) না পূন্দুনা লংথবাল মন্ট্রিখোং অৱাং লৈকায় কম্যুনিটি হোলদা ৱাকৎ খোঙজঙ চত্থখ্রে।

খোঙজঙদুদা শরুক য়াখিবী অপূনবা মৈরা পায়বী লূপ অসীগী সেক্রেটরি য়েন্সেম্বম ওঙবী সুনিটানা হায়, মনিপুরদা কুকি-জো কাঙলূপকি মিলিটেন্টশিংনা মমাঙ চহী ২০২৩ গী মে অহুমদগী ঙসিফাওবা লেপ্তনা মৈতৈ ফূরূপকি মথক্তা লান্দারক্তুনা মীওই কয়া হাৎলিবা, য়ূম লীশীঙ কয়া মৈ থাদোক্তুনা ঊৎ ওলহল্লিবা, মীওই লীলীঙ হুম্ফু হেন্না লাঞ্জেন্নহন্দুনা রিলিফ কেম্পশিংদা লৈরিবসিদা পুলিস কম্মান্দোশিংনা করিসু তৌবা ঙমজদ্রি। মনিপুর পুলিস কম্মান্দোশিংনা ঙসীফাওবদা কুকি-জো মিলিটেন্ট অমত্তা ফাবা নত্রগা হাৎপা য়াওখিদ্রি। মনিপুরগী মীয়াম ঙাক- শেনগদবা পুলিস অমসুং সেন্ট্রেল সেক্যুরিটি ফোর্স পার্সনেলশিংনা মথৌ তৌরক্তবদগী মীয়াম পাক্তক্না শিবা-শোকপা য়াওরক্লবদা খুল ঙাকপা ঈচাশিং চোংথোরক্তুনা মীয়ামগী পুন্সি কন্দুনা লাক্লিবনি।

মরম অসিনা খুলঙাকপা ঈচাশিং কৈদৌনুংদা ফাজিনবা অমসুং হাৎপা অমত্তা য়ারোই। কুকি টেরোরিষ্ট শিংদা মথৌনা ফূদোকপগী মহূত্তা মৈতৈ খুল ঙাকপশিংদা থৌনা ফূদোক্লিবা পুলিস কম্মান্দোশিংগী মথক্তা লৈঙাক্না অকনবা এক্সন লৌখত্তুনা চৈরাক পীয়ু হায়খি।