হান্নগী প্রাইম মিনিষ্টর মনমোহন সিংহ দিল্লিগী এইমস হোস্পিটালদা ঙরাং নুংদাং পুন্সিগী অরোয়বা য়াহীপ তানখ্রে

কংগ্রেস না লুচিংবা য়ুনাইটেদ প্রোগ্ৰেসিভ ফ্রন্ট লৈঙাক মতমদা কুমশিং ২০০৪ দগী ২০১৪ ফাওবা, টার্ম অনী থংননা লৈবাক অসীগী প্রাইম মিনিষ্টর ওইনা থৌ পুরমখিবা শক্নাইরবা রিফোর্মিষ্ট দা. মনমোহন সিংহ মশাগী অনাবা অমদগী ঙরাং নুংদাং পূং ৯.৫১ চৎপা মতমদা ন্যু দিল্লিদা লৈবা ওল ইন্দিয়া ইন্সটিটিউট অফ মেদিকেল সাইন্সেস (এইমস) হোস্পিটালদা লৈখিদ্রে।  পুন্সিগী অরোয়বা য়াহীপ তানখ্রবা হান্নগী প্রাইম মিনিষ্টর অসিনা মহাক্কি লোয়নবী গুরশরন কৌর অমসুং মচানূপী ৩ থম্লম্মি। মহাক লৈখিদবগী পাউ তাবদা কংগ্রেস লুচিংবী সোনিয়া গান্ধী অমসুং প্রিয়াঙ্কা গান্ধিগা লোয়ননা এইমসতা লাক্তুনা য়েংলখিবগা লোয়ননা  অৱাবা ফোঙদোকখি।

ইন্দিয়াগী ১৪ শুবা প্রাইম মিনিষ্টর অসী চহী মতাংগা মরী লৈনবা অনাবগী লাইওংশিংগা লোয়ননা হৌখিবা থা খরা অসীদা মশা শোন্থরকপদগী ঈমূংগী মীওইশিংনা কূপশেন শেন্নদুনা সেবা তৌদুনা লৈরকখিবনি হায়রি। ঙরাং গ্যান মাঙলকপদগী রিসসাইটেটিব মিজরশিং মশাগী য়ূমদা লৌখত্তুনা ফিভম খরা ফগৎহন্ননবা হোৎনরবা মতূংদা ন্যু দিল্লিগী এইমস হোস্পিটালগী মেদিকেল ইমর্জেন্সিদা নুংদাং পূং ৮.০৬ তা পুখৎলকখিবনি । দাক্তরশিংনা ফনা কন্না চেকশীন-থৌরাং লৌখত্তুনা হোৎনজখি অদূম ওইনমক হোৎজবা পূম্নমক কান্নবা ফংখিদ্রে। ঙাইহাক লায়কন্নরম্লবা মতূংদা হান্নগী প্রাইম মিনিষ্টর অসী মফমদুমক্তদা পুন্সিগী অরোয়বা য়াহীপ তানখিবনি হায়রি।

মহাক মশাগী চহী ৯২ শুখ্রে। মহাক লৈখিদবদা প্রসিদেন্ট দ্রৌপদি মুর্মু, প্রাইম মিনিষ্টর নরেন্দ্র মোদি, কংগ্রেস লুচিংবশিং, রাজ্য সভাগী চ্যেরমেন জগদিপ ধঙ্কর অমদি অতৈ লুচিংবা কয়ানা অৱাবা ফোঙদোকখ্রে। ইন্দিয়ান ইকোনমিগী অহানবা রিফোর্মিষ্ট অসী লৈখিদবদা জাতি অসীনা চয়োল অমা চূপ্না অৱাবা ফোঙদোক্তুনা জাতিগী ফীরাল তঙ্খায় চিংথনবা ৱাফম লাউথোকখ্রে।