মমাঙ চহীগী মে অহূমদগী মনিপুরদা চিন-কুকি টেরোরিষ্টশিংনা চত্থরক্লিবা হীংশাগী ঈরাং অসী লোইশিন্ননবা কনক্রিট ওইবা থবক পায়খৎলু, হীংশাগী ঈরাং অসী লোইশিন্ননবা হোৎনবদা প্রাইম মিনিষ্টর নরেন্দ্র মোদিনা মনিপুরগী মীয়ামগা খূৎশম্নদুনা থবক পায়খৎমিন্ননবা হোৎনবিয়ু লোয়ননা মহাক্না মনিপুরদা হকথেঙননা লাকপিদুনা ঈরাং অসী লাকশীল্লু হায়বা দিমান্দ শিংগা লোয়ননা ইন্দিয়া ব্লোক, মনিপুরনা প্রাইম মিনিষ্টর দা বার্তোন তৌখ্রে।
ইন্দিয়া ব্লোক মনিপুরগী কনভিনর খেত্রিময়ুম সান্ত অমসুং মনিপুর প্রদেশ কংগ্রেস কম্মিটিগী প্রসিদেন্ট কৈশাম মেঘচন্দ্র না পূন্না সাইন তৌদুনা পীশীনখিবা ইনভাইটেসন অদুদা মরুওইনা পল্লিবা ৱাফম খরগী মনূংদা প্রাইম মিনিষ্টর অসী চৎলিবা চহী অসীনা লোয়দ্রিঙৈ মনূংদা মনিপুরদা লাকপিদুনা ঈরাং অসী লোইশিন্ননবা হোৎনবিয়ু; করিগুম্বা প্রাইম মিনিষ্টর মনিপুরদা লাকপদা খুদোং চাখিরোই হায়রবদি ওল পোলিটিকেল পার্টিগী মীহূৎশিং পি এম ও দা নত্রগা পি এমগী রেসিদেন্স তা লাক্ননবা বার্তোন তৌবিরকউ অদূগা হীংশাগী ঈরাং অসী লোইশিন্ননবা হোৎনবদা মনিপুরগী মীয়ামগা প্রাইম মিনিষ্টরগা হকথেঙননা খূৎশম্নদুনা চৎমীন্নবা য়াহনবিয়ু লোয়ননা মনিপুরদা মহৌশাগী ঈং- তপ্পা শক্তম অথূবা মতমদা হঞ্জিলহল্লু হায়বসিনি।