জীরীগী মীহাত্তা চেন্নবা খরগী মশক খঙদোকপা ঙম্লে, মীয়ামগী দিমান্দ অয়াম্বা ফংহনবা ঙম্লক্লে, অহেনবা খোঙজঙশিং হন্দোকপীরো:সি এম

হন্দক জিরিবামদা কুকি মিলিটেন্ট শিংনা নোংমৈ কাপশীল্লক্তুনা অমদি রোকেট লোঞ্চরনচিংবা কাপ্লকপদা মীওই কয়া শিখিবা, য়ূম-দুকানশিং মৈ চাকহনখিবা, সেক্যুরিটি ফোর্সকি পার্সনেল অমা লৈখিদবা, পীক্লিবা অঙাঙ অহুম অমসং মরাল লৈজদ্রবা নূপী অহুম য়াওরগা পূন্না মীওই তরুক কিদনেপ তৌখ্রবা মতূংদা য়াম্না তমথিবা মওংদা হাৎখিবা থৌদোকশিংদা চেন্নবা লোয়ননা নবেম্বর ৭ তা নূপী অমা তমথীনা হাৎখীবা থৌদোক্তা চেন্নবা মিলিটেন্টশিংগী মনূংদা খরগীদি মশক-মমিং খঙবা ঙম্লকলে।

মরম অসীনা মীয়াম্না জষ্টিস ফংবা পাম্লিবা কয়াদু পীবা ঙম্ননবা নেস্নেল ইনভেষ্টিগেসন এজেন্সি (এন আই এ) না কেস লৌখৎপসু লৈরবনিনা শোয়দনমক মরাল লৈবশিং ফাগত্তুনা মতীক চাবা চৈরাক পীরগদবা মরম্না মীয়ামগী কা হেঞ্জিনবা খোঙজঙশিংদি লায়রবা, নোংমগী খূৎশূমন্না ঈমূং-মনূঙ পুরিবা কয়া অসীগী য়েংবিরগা হন্দোকপিরো, শান্তি ওইবা খোঙজঙখক্তমক চঙশিনবিয়ু হায়না চিফ মিনিষ্টর নোংথোম্বম বিরেন্না মনিপুরগী মীয়ামদা আপিল তৌখ্রে। ঙরাং ইম্ফালদা লৈবা সি এম বঙ্গ লোগী দরবার হোলদা পাউমীশিংগা উনবদা চিফ মিনিষ্টরনা ৱাফম অসী ফোঙদোকখিবনি।

জিরিবামগী মীওই তরুক কিদনেপ তৌখ্রবা মতূংদা য়াম্না তমথিবা মওংদা হাৎখিবা, নূপী অমা নবেম্বর তরেত্তা হাৎলম্বা, বোরোবেক্রাদা লৈবা সি আর পি এফ পোষ্টতা এত্তেক চত্থখিবা থৌদোকশিংগী মতাংদা এন আই এ না কেস লৌখত্তুনা ইনভেষ্টিগেসন চত্থবা হৌখ্রে, মীহাৎপশিং ফংদ্রিফাওবা সেক্যুরিটি ফোর্সনা থিজিন-হুমজিনবা লেপখিরোই, মীয়াম্না থাজবা থম্নরিবা সি আর পি এফ অমসুং বি এস এফ পার্সনেল শিং দিপ্লোই তৌরে, মনিপুরদা ঈরাং লৈবদগী এন আই এ ইম্ফাল দা লৈরম্বা ক্রিমিনেল কেস নিপান গুৱাহাটিদা লৈবা এন আই এদা নৌনা সুপ্রিম কোর্টনা শিন্নখ্রে।সেন্টর অমসুং ষ্টেট লৈঙাক হৌজিক তূমিন্না খক লৈথোক্তে। মীয়ামগী নীংবা থুংহনবা ঙম্ননবা হোৎনরি। মরম অসিনা মীয়াম্না কা হেঞ্জিনবা খোঙজঙশিংদি লায়রবা মীয়ামগী, মহৈরোয়শিংগীদমক য়েংলগা হন্দোকপিরো হায়বা ৱাফম চিফ মিনিষ্টরনা থমখি।