কুকি মিলিটেন্টশিংনা কিদনেপ তৌখিবা নূপী- অঙাঙ তরূকমক হাৎলগা হুন্দোরকপা থেংনখ্রে, এম এল এ-মিনিষ্টর খরগী য়ূম মৈ থাখ্রে, সি এমগী য়ূমদা মীয়াম্না থোমজীনখ্রে

হৌখিবা নবেম্বর ১১দা চিন কুকি মিলিটেন্টশিংনা জিরিবাম দিষ্ট্রিক্টকি বোরোবেক্রা পুলিশ ষ্টেশন মনূংচন্না লৈরিবা জাকুরাধোর খুঙ্গংদগী অঙাঙ অহুম অমসুং নূপী অহুম- পূন্না মীওই তরুক কুকি মিলিটেন্টশিংনা কিদনেপ তৌখিবা মতূং চৎলিবা থা অসীগী ১৪ অমসুং ১৫ দা বরাক তুরেলদগী অশীবা হকচাং ওইনা মীয়াম্না ফংখিবদগী খোয়শাওনরবা মীয়াম্না হৌনরুবা লৈতনা চঙশীল্লকখিবা অকনবা খোঙজঙদা মনিপুরগী এম এল এ, মিনিষ্টর খরগী য়ূমশিং মীয়াম্না মৈ থাবা য়াওনা অকায়- অতোয় কয়ামরুম থোকহনখ্রে।

পেন্নদ্রবা মীয়াম্না থা অসীগী ১৬ কি নুমিদাংদা মায়কৈ কয়াদগী থোমজীন্নরক্তুনা চিফ মিনিষ্টর নোংথোম্বম বিরেনগী লুৱাংশংবমদা লৈবা য়ূম, খূরায় কেন্দ্রগী এম এল এ লৈশাংথেম সুসিন্দ্রোগী খূরায় তিন্সিদ রোদতা লৈরিবা য়ূম, মিনিষ্টর কোন্থৌজম গোবিন্দাসকি নিংথৌখোংদা লৈবা য়ূম, থাঙ্গা কেন্দ্রগী এম এল এ তোংব্রম রোবিন্দ্রোগী কৈরেনফাবিদা লৈবা য়ূম, কৈশাম্পাৎতা লৈবা কৈশামথোং কেন্দ্রগী এম এল এ নিশিকান্তগী য়ূম, সগোলবন্দ কেন্দ্রগী এম এল এ আর কে ইমোগী য়ূম, তেরা সাপম লৈরক্তা লৈবা পাৎশোয় কেন্দ্রগী এম এল এ সাপম কুঞ্জকেশ্বরগী য়ূম, উরিপোকতা লৈবা উরিপোক কেন্দ্রগী এম এল এ ওইরিবা কে ঐচ রঘুমনিগী য়ূম, লম্ফেল সনাকৈথেলদা লৈবা হেল্থ মিনিষ্টর দা. সাপম রঞ্জনগী ওফিসিয়েল ক্বার্টর, নাউরিয়া পাখঙলাকপা কেন্দ্রগী এম এল এ ওইরিবী এস কেবিগী য়ূম অমসুং নিত্যাইপাৎ চুথেক্তা লৈবা বি জে পিগী ওফিসতসু মীয়াম্না থোমজীন্নরক্তুনা চিফ মিনিষ্টর বিরেন, মহাক্কি মিনিষ্টর, এম এল এ শিং পেম্নমক অমত্তা মতীক চাদ্রে ফম থাদোক্কদবনি হায়বা ঈহৌ চত্থরক্তুনা মৈ থাবা য়াওনা অমাঙ- অতা কয়ামরুম থোকহনখি।