মালেম অসীদা ঐখোয় পূন্না হিংমিন্নগদবনি হায়না লাউনরবসু অচৌবনা মচাশিংবু তুহৎপীবগী হৈনবিদি থাদোক্ট্রি:নীংতম্বা

মালেম লৈকোয়পূং অসীদা খুন্দা-লৈতাদুনা লৈমিন্নরক্লিবা ঐখোয় মীওইবা মশেলগী মরক্তা অমগা অমগা নুংশি-চান্ননা, অরৈ-লৈতা তাথোক তাশীন তৌনদুনা পূন্না হিংমিন্নগদবনি হায়না ঈশা-ঈশানা কন্না লাউরবসু অচৌবা কাঙলূপ্না মচাশিংবু, অদূগা মরল মথুম পায়বা, ঈনাকখুনবশিংনা লৈত-লায়রবা, তোল্লবশিংবু নমথবগী, নৈহৎপীবগী হৈনবি লীচৎ অসীমদি কোক্ট্রি, অদূম্মক চত্থদুনা লাক্লি হায়না পাম্বৈনা লুচিংবা য়ূ এন এল এফ কি এসিষ্টেন্ট সেক্রেটরি (ঐচ আর দি) থাংজম নীংতম্বনা ফোঙদোকখ্রে।

ৱারল্ড হ্যুমেন রাইটস প্রোটেক্সন ওরগনাইজেসন মনিপুর ষ্টেটনা শীন্দুনা ঙরাং ইম্ফালদা লৈবা মনিপুর প্রেস ক্লবকি থাংজিং হোলদা পাঙথোকখিবা ৱারল্ড হ্যুমেন রাইটস ডে থৌরমদা শরুক য়াখিবা নীংতম্বনা ৱাফম অসী ফোঙদোকখিবনি। মীওইবা মশেল পূন্না, নুংশি-চাননা হিংমিন্নগদবনি হায়না ঐখোয়না মালেম শীন্থুংনা লাউরি, মান্নবা হক্কিদমক লো কয়ামরুম শেমদূনা লৈরি, অদূম ওইনমক অচৌবনা মচাশিংবু তুহৎনবগী পোরম কাঙবদি লেপ্তনা চত্থরি। মমাঙ চহীগী মে অহুমদগী কুকিশিংনা মৈতৈগী মথক্তা অকনবা লান হৌরক্তুনা এত্তেক তৌরক্লিবা অসীসু অসীগুম্বা মখলগী মীওইবগী হক তা চাউনা শীঙনরকপগী ময়েক লারবা খূদম অমনি হায়না মহাক্না ফোঙদোকখি।

মখোয়না দিমান্দ তৌরিবা খূদীংদা মৈতৈনা অথিংবা পীখিবা লৈতে। দিমান্দ হায়বসিদি তানবদা কনানসু য়েৎফম থোক্তে, মদূ ফংবা-ফংদবা হায়বদুনা তোঙানবা অমনি। মখোয়গী দিমান্দ মৈতৈনা পীগদবা অমসুং পীবা ঙম্বা অথোরিটিসু নত্তে। মরম চাদনা মৈতৈদা এত্তেক তৌরকপা অসীদি মৈতৈ ফূরূপকি হিংবগী হক তা ফোংনা শীংনরকপনি হায়খি।