অনৌবা, চাওখৎপা মনিপুর শেম্বদা মনিপুরি দাইস্পোরাশিংগী থৌদাং য়াম্না চাউই: দা. বিমোল অকোয়জম

অনৌবা চাওখৎপা মনিপুর অমা ওইহন্ননবা হোৎনবদা মপান লৈবাকশিং অমসুং ইন্দিয়াগী তোঙান তোঙানবা ষ্টেটশিংদা লৈখ্রবা মনিপুরী দাইস্পোরাশিংগী থৌদাং য়াম্না চাউই হায়না ইন্নর মনিপুরগী লোক সভাগী এম পি ওইনা লৈরিবা দা. অঙোমচা বিমোল অকোয়জম্না ফোঙদোকখ্রে। এসোসিয়েসন ওফ মনিপুরি দাইস্পোরা (আমন্দ) পুনেগী ১৩ রক শুবা এন্যুয়েল মিট কম কলচরেল প্রোগ্রাম পুনেদা পাঙথোকখিবগা লোয়ননা থৌরমদুদা শরুক য়ারদুনা মহাক্না ৱাফম অসী ফোঙদোকখিবনি। আমন্দ অসী মহারাষ্ট্রগী পুনে অমসুং মসীগী অকোয়বা মফমশিংদা খুন্দা-লৈতাদুনা অমসুং তোঙান তোঙানবা শিনফমশিংদা থবক তৌদুনা লৈখ্রবা, ৱাখল্লোন মান্নবা মনিপুরি দাইস্পোরাশিংনা পূন্দুনা অদুঙৈ কুমশিং ২০১১ গী সেপ্তেম্বর ২১দা শেমখিবা, নোন-প্রোফিটেবল, নোন-গভর্নমেন্টেল কম্মুনিটি ওরগনাইজেসন অমনি।

পুনে য়ুনিভর্সিটিগী এলুম্নস অমসু ওইরিবা দা. অঙোমচা বিমোল অকোয়জমনা ফোঙদোকখিবদা, মুম্বাই, পুনে, হায়দরাবাদ, বেঙ্গলোর, দিল্লি অমদি ইন্দিয়াগী ৱাংমদা লৈখ্রবা মনিপুরি দাইস্পোরা কয়ানা ঙসিদি মহৌশাগা মান্নদবা মওংদা ঈরমদম মনিপুরদা অওনবা, অহোংবা চাওখৎপা পুরক্নবগীদমক রাজনিটিগি অহোংবা অমা পুরক্তবা য়াদ্রে হায়বগী অচেৎপা ফিরেপ অমগা লোয়ননা মনিপুরদা হকথেংননা লাক্তুনা, হন্দক পাঙথোকখিবা লোক সভাগী মীখলদা মহাকপু নুংশিবিদুনা মহাক্কি সিম্বোলদা ভোৎ থাদবিখি হায়না অপেনবা ফোঙদোকখি।

মীয়ামগী মতেং য়াওদনা মহাক্না করিগুম্বা চাওখৎ থৌরাংগী থবক-থৌরম অমত্তা পায়খৎপা ঙম্লোইদবনা মহাকপু মতম পূম্নমক্তা মীয়াম্না মতেং পাংবিয়ু হায়খি। মপান লৈবাক্তা লৈনখ্রবসু ঈরমদম নুংশিবগী ইহুলদি থম্মোয়-থম্মোয়শিংদা লৈনরিবা মনিপুরিশিংনি হায়না বিমোলনা মখা তানা ফোঙদোকখি।