সেন্টরগী বি জে পিনা লুচিংবা এন দি এ লৈঙাকতা য়াওরিবা লুচিংবা মীওই খরনা কংগ্রেস লুচিংবা রাহুল গান্ধিদা থ্রেট তৌদুনা নুঙাইতবা কয়ামরুম পোকহনবগী মায়োক্তা খম-থেংনা পেন্দবা ফোঙদোকপগা লোয়ননা ইন্দিয়াগী তোঙান তোঙানবা মফমশিংদা ৱাকৎ- মীফম ফম্বা, প্রোটেষ্ট-রিলিনচিংবা পাঙথোক্নরি। খোঙজংশিং অদূবু শৌগৎপগা লোয়ননা মনিপুর প্রদেশ কংগ্রেস কম্মিটিনসু অকনবা প্রোটেষ্ট তৌরি।
মসীগী শরূক অমা ওইনা এম পি সি সিগী প্রসিদেন্ট ওইনা লৈরিবা এম এল এ কৈশাম মেঘচন্দ্রনা লুচিংদুনা ঙরাং ইম্ফাল সিটি পুলিস ষ্টেসনগী ওফিসার- ইন- চার্জ গী মফমদা কমপ্লেন্ট অমা থাঙ্গত্তুনা খূৎশিন্নখ্রে। কমপ্লেন্ট থাঙ্গৎখিবগী খোঙচৎ অদুদা এম পি সি সিগী ৱার্কিং প্রসিদেন্ট ভীক্তর কৈশীং, ভাইস প্রসিদেন্ট হরেশ্বর গোশ্বামি, ভাইস প্রসিদেন্ট ওইনা লৈরিবা ওজা ইমো অমসুং পার্টিগী অতৈ লুচিংবা কয়াসু শরুক য়াখি।
ইম্ফাল সিটি পুলিসকি ও সিগী কাদা চঙদুনা কমপ্লেন্ট অদূ ও সি মশামক্তা শিন্নখিবনি। কংগ্রেস লুচিংবা রাহুল গান্ধিদা থ্রেট তৌদুনা নুঙাইতবা কয়ামরুম পোকহনবগী থবক চত্থৈ হায়রিবা মীওইশিং অদুদি বি জে পিগী নেস্নেল লিদর তরবিন্দর সিংহ মরৱা না চৎলিবা সেপ্তেম্বর থা অসীগী ১১ দা, সিব সেনা একনাথ সিন্দেগী এম এল এ সঞ্জয় গাইকৱাদনা থা অসীগী ১৬ তা, রেলৱেগী মিনিষ্টর ওফ ষ্টেট রভনিট বিটুনা থা অসীগী ১৫ দা অদুগা মিনিষ্টর রঘুরাজ সিংহনা চৎলিবা থা অসীগী ১৬ তনি হায়রি।