নূপীশিংগী রাইট মপূংফানা ফংনবগীদমক হনবা নাইদনা খোঙজং চঙশীনগদবনি: সুন্দরী

ওল মনিপুর দেমোক্রেটিক ৱিমেন্স এসোসিয়েসন ( অমদৱা) লিংখৎখিবগী ২৯ শুবা কুম্মোন থৌরম ঙরাং ইম্ফালগী পাউনা কৈথেল নম্বুল মপালদা লৈবা এসোসিয়েসন অসীগী ওফিসতা চীঙ-লেম্না অমসুং মপূংফানা পাঙথোকখ্রে। এসোসিয়েসন অসীগী থৌমিশিংনা শরুক য়াদুনা মপূংফানা পাঙথোকখিবা থৌরম অদুদা এসোসিয়েসন অসীগী প্রসিদেন্ট চনম্বম সুন্দরীনা ফোঙদোকখিবদা, হৌজিক্কি মতম অসীদা লমদম অসীগী নূপীশিংনা উথক্তগী ওন্থদুনা লৈমায়দা তারক্লবা অঙাওবা অঙাঙগুম পঙথদুনা লৈগদবা মতমদু নত্রে হায়খ্রে।

ঐখোয়না মতমসিদা পাঙথোক্কদবা ঈথৌ চপচানা মশক খঙগদবনি। ঈরমদমগী অপূনবা শক্তম কায়হন্দনবা হোৎনবদা নূপী ওইবীশিংনা লৌগদবা থৌদাং শীংথাবদা লোইনাইররোইদবা অমনি। চাকখূমদা চাক থোংবা, নূপাগী ফৈজোমখক শূ-চাম্ল গা, মদূনা নোংমগী ঈথৌদাংনি খন্দূনা পেন্থোক্তুনা লৈগদবা মতমদু ঙসীদি নত্রে। ঈশানা ঈশাগী রাইট মপূংফানা ফংজনবা হোৎনদ্রবদি মীতোপনা পুরক্লগা ঐখোয়দা ঈশাগী রাইট পীবিগদবা লৈতে হায়খি। নূপীশিংনা ঐখোয় নূপী ওইবীশিংবু ওৎ-নৈবগী থৌদোক্না খুনাইশিদা মশীং নোংমা- নোংমগী মশীং হেঙ্গৎলক্লি, নূপানা নূপী ওইবিশিংদা ওৎ- নৈবদগীদি নূপীশিংনা নূপীদা ওৎপগী থৌদোকশিংনা খুনাইশিদা মশীং হেল্লক্লি। মশীমক্তি য়াম্না ঈকায়নিঙায়নি, থম্মোয় শোক্নিঙায়নি হায়না মহাক্না ফোঙদোকখি।

অমদৱাগী জেনরেল সেক্রেটরি ওইনা লৈরিবি অয়েকপম আসালাটানসু মশাগী ওইবা মোৎ ফোঙদোক্লদুনা হায়খিবদা, মনিপুরদা ঙসীফাওবা চিন-কুকি মীলিটেন্টশিংনা চত্থরক্লিবা লান অসী বি জে পিগি দব্বল ইঞ্জিন লৈঙাক্না লোইশিনবা ঙমদবগী মরম করিনো, কদায়দা খুদোংচাদবা লৈবদগীনো হায়বদু মীয়ামদা চিংনবা লৈতনা, লৌথূপ-লৌকোই য়াওদনা শেংদোক্কদবনি,  মতমদুদা মীয়াম্ন সু মতেং পাংশিল্লক্কদবনি, মদূ নত্রবদি বি জে পিনা ঈরাং অসী থোকহনবগী তেকচাক পূম্নমক পুগদবনি হায়না ফোঙদোকখি।