মীওইবা খুন্নাইনা মহৌশাবু শীংনরুবদগী অঈং- অশাগী খল কায়থরক্লিবনি: এম পি সনাজাউবা

মালেম অসীদা হিংলিবা থৱায় পানবা জিবশিংগী মনূংদা ৱাখল খন্থবা ঙম্বা, ৱা ঙাঙথোকপা ঙম্বা অমসুং অচুম- অরানগী ফিরেপ লৌবা ঙম্বা মরম্না জিবা ময়ামগী মরক্তা খ্বাইদগী অথোয়বনি হায়না চাউথোকচরিবা, নাপলগা লোয়ননা হিংজরিবা মীওইবা ঐখোয়না ঈশা-ঈশাগী কান্নবা, ওইজবা থিদুনা ঙাইহাক-ঙাইহাক্কি খন্দুনা থবক তৌবদগী মালেমগী মহৌশাগী খোঙচত্তা চাউনা শীংনবা ওইরি। উমং- ৱামং পাক-সন্না কোকথোক্তুনা শেন্দাল লম্বী পাক-সন্না চত্থনরকপদগী ঈশীং- নুংশিৎকি অহোংবা লাক্তুনা মহৌশাগী খল কায়হল্লক্লি হায়না লৈশেম্বা সনাজাউবনা ফোঙদোকখ্রে।

অঈং- অশাগী খল কায়থরকপদগী মীওইবা ঐখোয়না মালেম অসিদা হিংদুনা লৈবদা অরুবা ফীভম অমা নোংমা- নোংমগী মায়োক্নরক্লে। মসীদগী খরমখৈ ঙাকথোক্তুনা তুংগী মীরোলশিংনা মালেম অসীদা হিংদুনা মখাতানা লৈহৌবা য়াননবা ঙসীগী মীরোলনা মফম চাবা এরিয়াশিংদা উপাল-ৱাপাল মরাং কায়না থাজিন্দুনা মদূবু হিংহন্ননবা হোৎনবগী তঙায়ফদবা লৈরি হায়না রাজ্য সভাদা মনিপুরগী এম পি ওইনা লৈরিবা নিংথৌ লৈশেম্বা সনাজাউবনা ফোঙদোকখি।

ঈমাগী মীংদা উ চারা অমা থাবা হায়না মিংথোনবা, চহী অসিগী জুন মঙাদা পাঙথোকখিবা ৱারল্ড এনভাইরনমেন্ট ডে থৌরমদা প্রাইম মিনিষ্টর নরেন্দ্র মোদিনা হৌদোকখিবা কেম্পেইন অসীগী মখা চত্থরকপা থৌরমদা এম পি অসীনা লুচিংদুনা পাঙথোকখিবা উ চারা থাবগী থৌরমদা সনাজাউবনা ৱাফম অসী ফোঙদোকখিবনি। ইম্ফাল ইষ্ট দিষ্ট্রিক্ট কি ৱাখাদা লৈবা নোংদম শঙলেন পাখংবা লাইনীংকোলদা উ চারা কয়ামরুম থাখিবা থৌরমদুদা মহাক্না মখা তানা হায়, মীওইবা খুনাইনা মহৌশা লাইরেম্বীদা শীঙনরুবদগী মালেমগী অঈং- অশাগী খল কায়থরক্তুনা কা হেন্না শাবা, কা হেন্না ঈংবগী শক্তমশিং মায়োক্নরক্লিবা অসীদগী ঙাকথোক্কে হায়রবদি উমং-ৱামং শেমগৎপা হায়বসি নত্তনা অতৈ পাম্বৈ অমা লৈতে।