লৈঙাক্কি আইন্না অথীংবা থমখ্রবা, কোইরেংনা লুচিংবা য়ুনাইটেদ নেস্নেল লিবরেসন ফ্রন্ট (য়ু এন এল এফ) না শীন্দুনা, লূপ অসীগী ঈহৌদা লৈবাক্কিদমক কত্থোক্তুনা থৌনা ফনা থৱায়না পোন্থা পীখ্রবা অথৌবশিং নীঙশীংবগী মাপনশুবা কুম্মোন-থৌরম ঙরাং মনিপুরগী মফমশিং অমসুং মনিপুরগী মপান্দা লৈরিবা তোঙান তোঙানবা মফমশিংদা পাক-সন্না, মপূঙ ফানা পাঙথোক্নখ্রে হায়রি।
খূৎলায় পায়বা য়াওল্লূপ অসীগী সেন্ট্রেল কম্মিটিগী পব্লিসিটি সেক্রেটরি এম শকহেন না খূৎয়েক পীদূনা থাদোরকপা প্রেস ষ্টেটমেন্ট অমদা হায়, হৌজিক লৈরিবা লৈবাক্কি ঈরাং অসীনা মরম ওইরগা মীয়াম পাক্তক্ননা অথৌবশিং নীংশীংবগী থৌরম পাঙথোকপদা খুদোংচাদবা কয়া মায়োক্নগদবনা, পার্টিগী সি ঐচ ক্যু,দিষ্ট্রিক্ট কম্মিটি শিং, ব্রাঞ্চ কম্মিটিশিং,এম পি এগী জি ঐচ ক্যু, বট্টালিয়নশিং, সব-য়ুনিটনচিংবা মফম কয়াদা অথৌবশিংগী নীংশিং থৌরম মপূঙ ফানা পাঙথোকখি হায়রক্লি।
চেরোল অসিনা মখা তানা হায়,পার্টী অসীগী লান্মীগী য়ুনিটশিংদসু লূপকি ফীরাল তঙ্খাই চিংথদুনা অয়ূক পূং ৫ দগী নুংথিল পূং ৫ ফাওবা থৌরম পাঙথোকখি। থৱায়না পোন্থা পীখ্রবা অথৌবশিং অদূগী মফমদা ঈকায়খুম্নবা উত্তুনা মিনিট অনী ৱা ঙাঙদনা, মখোয়গী থৱায়না লাইরম্লেন্দা ঈংনা চিক্না লৈরুনবা থৌনিজখি। লৈখিদ্রবশিং অদূগী মিতমশিংদা হৈকৎ-লৈকৎ তমদুনা ইকায়খুম্নবা ঊৎখি লোয়ননা থৌরমগী নুংগী ওইবা ৱারোল পাথোকখি হায়রি।