মালেমগী মফমশিং শীনবা থুংনা পাঙথোক্নবগুম মনিপুরদসু মফম কয়াদা তোঙান তোঙানবা লৈঙাক্কি ইন্সটিট্যুসন, দিপার্টমেন্ট, এজেন্সিশিং অমসুং লন্নাই লূপ কয়ানা শীন্দুনা ৱারল্ড ৱেটলেন্দ দে, ২০২৫ কি থৌরমশিং পাক-সন্না পাঙথোক্নখ্রে। ষ্টেট লৈঙাক্কি দিরেক্তরেট ওফ ইনভাইরোনমেন্ট এন্দ ক্লাইমেট চেঞ্জনা শীন্দুনা ষ্টেটকি থাক্তা ইম্ফাল গী কাঞ্চিপুরদা লৈরিবা লৈশাং হিদেন্দা পাঙথোকখিবা থৌরমদা অথোয়বা মীথূংলেন ওইনা শরূক য়ারদুনা ৱা ঙাঙবদা চিফ মিনিষ্টরনা য়ারল পাৎ অমসুং লম্ফেল পাৎ ৱাটর বোদি প্রোজেক্ট পায়খত্তুনা শেমগৎ শাগৎপা হৌরে হায়খ্রে।
মালেমগী হোংলক্লিবা অইং-আশাগী চৈথেঙ, ঈশীং-নুংশিৎকি অহোংবা কয়া লাক্তুনা অকোয়বগী ফীভম অমদি মহৌশাগী খল কায়থরক্লিবা কয়া অসীদগী লমদম অসীবু অমসুং ঐখোয়গী মালেম অসীবু কলহৌশি হায়রবদি উমং- ৱামং শেমগৎপা অমদি মহৌশাদগী লৈজরকপা পাৎ-তুরেলশিং, ৱেটলেন্দ শিং য়োকখৎপা তঙায়ফদে হায়না চিফ মিনিষ্টরনা ফোঙদোকখি।
লূপা ক্রোর ৬৫০ চঙনা লম্ফেল পাৎ ৱাটর বোদি শেমগৎলকপদগী ঙসীদি লমগী উচেক মখল-মখা কয়ামরুম লম্ফেল পাৎ ৱাটর বোদি অসীদা শঙ্গু-শঙ্গু পাইরক্তুনা চাক্তাররে, মহৌশা লৈরম্বা লম্ফেল পাৎকী শক্তম তপ্না-তপ্না হঞ্জিল্লকপা উবা ফংলক্লে হায়খি। লৈশাং হিদেন শেমগৎপগী অহানবা তাঙ্কক লূপা ক্রোর ১২.৮১ চঙনা পায়খৎপা হৌরে। নম্বুল তুরেল শেমগৎপসু হৌখ্রে হায়বা ৱাফমসু চিফ মিনিষ্টরনা ফোঙদোকখি।
